69 pacientë ende po trajtohen jashtë vendit

Ministria e Shëndetësisë ka informuar sot për momentin 69 pacientë po trajtohen jashtë vendit dhe nuk ka ndonjë ndryshim në gjendjen e tyre, krahasuar me ditët e mëparshme. Gjendja e pacientëve që janë në gjendje kritike gjithashtu mbetet e pandryshuar.

“Për momentin në institucionet shëndetësore në Shkup po trajtohen 15 pacientë edhe atë: në Klinikën kirurgjike “Shën Naum i Ohrit” – 6 pacientë, në Klinikën e kirurgjisë plastike – 4 pacientë të ardhur mbrëmë nga jashtë vendit, në Klinikën e toksikologjisë ka dy pacientë (njëri i transferuar më herët nga Klinika kirurgjike “Shën Naum i Ohrit” dhe një tjetër që ka ardhur gjatë natës nga Spanja), një pacient është i hospitalizuar në Klinikën e pulmologjisë, derisa në spitalin “Sistina” po trajtohen dy pacientë. Të gjithë pacientët që po trajtohen në institucionet tona janë në gjendje të qëndrueshme”, thonë nga Ministria.

Në komunikatë theksohet se Ministria e Shëndetësisë vazhdon të ndjekë me kujdes gjendjen e pacientëve të lënduar dhe mbetet në komunikim të vazhdueshëm me ekipet mjekësore brenda dhe jashtë vendit, e përkushtuar për të ofruar kujdesin më të mirë të mundshëm për të lënduarit nga aksidenti në Koçan.

Ndryshe në zjarrin më 16 mars në diskotekën “Puls” në Koçan jetën e kanë humbur 60 persona, ndërsa u lënduan rreth 200 persona.