Rrjeti i errët “764”: Fëmijët kthehen në viktima të manipulimit dhe dhunës
Hulumtim | Flaka Media | 20 nëntor 2026
Nga platformat e lojërave si Roblox dhe Minecraft, te komunikimet private në Discord dhe Telegram, rrjeti ndërkombëtar „764“ përdor manipulimin psikologjik, shantazhin seksual dhe kërcënimet për të ushtruar kontroll mbi fëmijët dhe adoleshentët. Në disa raste, viktimat detyrohen të vetëdëmtohen, të prodhojnë materiale eksplicite ose të kryejnë akte të dhunshme. Fenomeni ka marrë përmasa ndërkombëtare, ndërsa paralajmërimi i Ministrisë së Punëve të Brendshme më 20 nëntor ngre pikëpyetje edhe për sigurinë e fëmijëve në Maqedoninë e Veriut.
Një mesazh në internet, një kërkesë për miqësi apo një ftesë për të luajtur online mund të jetë fillimi i një marrëdhënieje që fëmija e percepton si krejtësisht të zakonshme. Por pas një profili anonim mund të fshihet një person që synon të fitojë besimin e tij, të sigurojë informacione personale dhe më pas t’i përdorë ato për manipulim, kërcënim dhe shantazh.
Ky është modeli i veprimit të rrjetit „764“, një ekosistem ndërkombëtar i grupeve dhe individëve që shfrytëzojnë platformat digjitale për të abuzuar me të miturit.
Rreziku qëndron edhe te fakti se këto aktivitete nuk zhvillohen domosdoshmërisht në hapësirat e fshehta të internetit. Kontakti fillestar me viktimat mund të krijohet në platforma që përdoren çdo ditë nga miliona fëmijë, si Roblox, Discord, Instagram, Snapchat dhe Minecraft.
Sipas dokumentacionit të publikuar nga institucionet amerikane dhe organizatat kërkimore ndërkombëtare, „764“ nuk është një grup i zakonshëm i shantazhit online. Në pjesë të këtij rrjeti, abuzimi seksual, vetëdëmtimi dhe dhuna përdoren si mjete për të fituar kontroll mbi viktimat dhe prestigj brenda komuniteteve kriminale.
Nga një komunitet online në një rrjet ndërkombëtar abuzimi
Origjina e „764“ lidhet me vitin 2021 dhe me Bradley Cadenhead, një adoleshent nga Stephenville i Teksasit, i cili në atë kohë ishte vetëm 15 vjeç.
Sipas hulumtimit të Institutit për Dialog Strategjik (ISD), Cadenhead krijoi komunitetin duke përdorur pseudonime si „Brad764“ dhe „Felix“. Emri „764“ lidhet me tri shifrat e para të kodit postar të zonës ku ai jetonte.
Rrjeti u zhvillua në një mjedis më të gjerë online të njohur si „Com Network“, ku grupe të ndryshme ndërthurnin shantazhin seksual, publikimin e të dhënave personale, kërcënimet dhe forma të tjera të kriminalitetit digjital.
Edhe pas arrestimit të themeluesit, komuniteti nuk u zhduk. Përkundrazi, ai u zgjerua përmes grupeve të reja, ndarjeve të brendshme dhe bashkëpunimeve ndërmjet individëve që përdornin të njëjtat metoda abuzimi.
Për këtë arsye, „764“ nuk duhet kuptuar si një organizatë tradicionale me seli, hierarki të qëndrueshme dhe një drejtues të vetëm. Emri përfshin një ekosistem të ndryshueshëm grupesh dhe individësh, të cilët mund të bashkëpunojnë, të ndahen ose të krijojnë struktura të reja.
Si i gjen fëmijët dhe si i fut nën kontroll?
Mënyra e veprimit të rrjetit zakonisht fillon me krijimin e një raporti besimi. Anëtarët mund të paraqiten si bashkëmoshatarë, miq të rinj ose persona që ofrojnë mbështetje emocionale. Në disa raste, ata krijojnë identitete të rreme për të fituar afërsinë e fëmijëve.
Hulumtimi i organizatës PERIL, i publikuar në vitin 2026, identifikon një model me tri faza: kontaktin fillestar, manipulimin dhe kontrollin, si dhe shpërndarjen e materialeve dhe përshkallëzimin e abuzimit.
Faza e parë – Kontakti. Viktimat kërkohen në lojëra online dhe rrjete sociale. Në këtë fazë, komunikimi mund të duket si një miqësi e zakonshme.
Faza e dytë – Manipulimi. Komunikimi zhvendoset në biseda private, ku abuzuesit përpiqen të krijojnë varësi emocionale dhe të marrin informacione personale, fotografi ose materiale intime.
Faza e tretë – Shantazhi dhe kontrolli. Pasi sigurojnë materiale komprometuese, autorët fillojnë të kërcënojnë viktimën me publikimin e tyre te prindërit, familjarët, shokët ose bashkëmoshatarët.
Në këtë pikë, fëmija mund të bindet se nuk ka rrugëdalje. Frika nga turpërimi, ndëshkimi familjar ose ekspozimi publik e bën më të vështirë kërkimin e ndihmës.
Një aspekt veçanërisht shqetësues është se disa viktima manipulohen për të kontaktuar dhe shantazhuar fëmijë të tjerë. Në këtë mënyrë, rrjeti mund ta shndërrojë një viktimë në instrument të abuzimit ndaj personave të tjerë.
Platformat e lojërave, porta hyrëse drejt komunikimeve të rrezikshme
Is Roblox Safe for Kids? What Parents and Schools Need to Know
Come Build Where the World Plays
Telegram messenger for interview – dvroc
Një nga zbulimet më të rëndësishme të hulumtimit PERIL është përdorimi i platformave të zakonshme si pikënisje për kontaktin me viktimat.
Nga 85 persona të identifikuar në rrjetin e analizuar nga studiuesit, 72 kishin lidhje të dokumentuara me platforma të caktuara digjitale. Hulumtimi evidenton 25 platforma të ndryshme.
Sipas të dhënave:
- 51 persona kishin lidhje me Discord.
- 37 me Telegram.
- 17 me Snapchat.
- 13 me Roblox.
- 13 me Instagram.
- 5 me TikTok.
- 4 me Facebook.
Një person mund të jetë i lidhur me disa platforma, prandaj këto shifra nuk duhen mbledhur për të nxjerrë numrin e përgjithshëm të pjesëmarrësve.
Studiuesit vërejnë se Discord dhe Telegram përbëjnë pjesën kryesore të komunikimit operacional të rrjetit. Ndërkohë, lojërat dhe rrjetet sociale përdoren për të gjetur viktima të reja.
Kjo është arsyeja pse një fëmijë mund të fillojë komunikimin në një lojë dhe më pas të përfundojë në një grup privat ku përballet me presion dhe kërcënime.
Megjithatë, prania e Roblox, Discord, Telegram apo Minecraft në telefonin e një fëmije nuk përbën vetvetiu shenjë rreziku. Problemi është mënyra se si persona të caktuar i shfrytëzojnë këto platforma për të krijuar kontakte dhe për të ushtruar kontroll mbi të miturit.
„Lorebooks“ – kur vuajtja e viktimave shndërrohet në monedhë digjitale
Një prej elementeve më shqetësuese të dokumentuara në hetimet amerikane është përdorimi i të ashtuquajturave „Lorebooks“.
Bëhet fjalë për arkiva digjitale ku grumbullohen materiale të abuzimit, pamje të dhunës dhe të dhëna që lidhen me viktimat.
Në njoftimin e Departamentit amerikan të Drejtësisë për rastin e Prasan Nepal, autoritetet shpjegojnë se këto arkiva përdoreshin si një lloj monedhe brenda rrjetit „764“.
Materialet shkëmbeheshin, ruheshin në hapësira të koduara dhe përdoreshin për rekrutimin e anëtarëve të rinj ose për fitimin e statusit brenda komunitetit.
Kjo krijon një mekanizëm të rrezikshëm: abuzimi nuk kryhet vetëm për të kontrolluar një viktimë, por edhe për të fituar njohje dhe ndikim te anëtarët e tjerë.
Në disa raste, sa më ekstreme të jenë materialet që një person arrin të sigurojë, aq më shumë mundësi ka të fitojë prestigj brenda grupit.
Kështu, dhuna dhe poshtërimi i viktimave kthehen në një lloj gare për status në komunitetin kriminal.
Vetëdëmtimi, dhuna dhe nxitja drejt vetëvrasjes
Veprimtaria e „764“ shkon shumë përtej shantazhit seksual.
Sipas FBI-së dhe dokumenteve të Departamentit amerikan të Drejtësisë, anëtarët e rrjetit janë përfshirë në raste ku viktimat janë kërcënuar ose detyruar të prodhojnë materiale që tregojnë vetëdëmtim, akte seksuale, dhunë ndaj kafshëve dhe veprime të tjera të rrezikshme.
Në rastet më ekstreme, abuzuesit synojnë që viktima të kryejë akte të rënda vetëdëmtimi ose të tentojë t’i japë fund jetës.
Një pjesë e këtij fenomeni lidhet me atë që studiuesit e quajnë Nihilistic Violent Extremism, ose ekstremizëm i dhunshëm nihilist.
Ky koncept përshkruan një mjedis ku dhuna, mizoria dhe shkatërrimi glorifikohen, ndërsa anëtarët konkurrojnë për famë dhe njohje përmes veprimeve gjithnjë e më ekstreme.
Nuk bëhet fjalë për një ideologji të vetme politike që i bashkon të gjithë pjesëmarrësit. Në shumë raste, motivet janë dëshira për pushtet psikologjik, përkatësi, vëmendje dhe status brenda komunitetit.
Një rrjet me shumë degë dhe emra të ndryshëm
Për shkak të ndarjeve dhe konflikteve të brendshme, ekosistemi i lidhur me „764“ përfshin edhe grupe të tjera.
Në hulumtimet e studiuesve përmenden emra si „764 Inferno“, „No Lives Matter“ (NLM), „CVLT“ dhe komunitete të tjera të lidhura me rrjetin më të gjerë „Com“.
Këto grupe nuk kanë domosdoshmërisht të njëjtën strukturë, organizim ose përgjegjësi kriminale. Disa kanë lidhje të drejtpërdrejta, ndërsa të tjera janë pjesë e mjedisit më të gjerë ku qarkullojnë të njëjtat metoda dhe praktika abuzimi.
Një rast i rëndësishëm është bashkëpunimi i dokumentuar ndërmjet „764“ dhe „No Lives Matter“, një grup që glorifikon dhunën dhe nxitjen e akteve të dhunshme në botën reale.
Studiuesit kanë evidentuar se ky ekosistem mund të përfshijë jo vetëm shantazh seksual dhe krime kompjuterike, por edhe kërcënime ndaj shkollave, sulme fizike dhe nxitje të dhunës ndaj personave të tjerë.
295 arrestime në 33 shtete – përmasat e dokumentuara të fenomenit
295
Arrestime – Persona të lidhur me Com Network
33
Shtete – Ku janë evidentuar arrestime
5.375
Viktima dhe subjekte të prekuraSipas dataset-it të studiuesve
22
Vdekje të evidentuara
Në rastet e lidhura me ekosistemin
Të dhënat e West Point mbulojnë periudhën 1 shkurt 2020 – 20 maj 2026 dhe i referohen Com Network në tërësi, jo vetëm grupit „764“.
Një studim i publikuar në qershor 2026 nga Qendra për Luftimin e Terrorizmit në Akademinë Ushtarake West Point identifikoi 295 arrestime të lidhura me „Com Network“ në 33 shtete.
Sipas të njëjtit hulumtim, këto raste lidhen me 5.375 viktima dhe subjekte të prekura, përfshirë 1.747 viktima të shantazhit sadist online, 1.754 viktima të ndërhyrjeve të rreme policore të njohura si „swatting“ dhe 1.633 viktima të krimeve kibernetike.
Studiuesit evidentuan gjithashtu të paktën 22 vdekje në rastet e përfshira në dataset.
Këto shifra nuk përfaqësojnë viktimat vetëm të „764“, por të ekosistemit më të gjerë „Com Network“, ku veprojnë edhe grupe të tjera.
Autorët e studimit paralajmërojnë se të dhënat janë të pjesshme. Shumë raste nuk bëhen publike, veçanërisht kur personat e përfshirë janë të mitur ose kur dosjet gjyqësore përmbajnë materiale të ndjeshme.
Arrestimi i drejtuesve dhe zhvillimi i rëndësishëm gjyqësor në SHBA
Një nga zhvillimet më të rëndësishme në luftën kundër këtij rrjeti ndodhi në vitin 2025, kur autoritetet amerikane arrestuan dy persona të identifikuar si figura drejtuese të „764“.
Bëhet fjalë për Prasan Nepal, i njohur me pseudonimin „Trippy“, dhe Leonidas Varagiannis, i njohur si „War“.
Nepal u arrestua në prill 2025 në Karolinën e Veriut, ndërsa Varagiannis u arrestua në Greqi. Të dy u akuzuan për përfshirje në një ndërmarrje ndërkombëtare të shfrytëzimit të fëmijëve.
Më 9 tetor 2026, Departamenti amerikan i Drejtësisë njoftoi se Nepal kishte pranuar fajësinë për komplot për shfrytëzimin seksual të një të mituri.
Sipas dokumenteve gjyqësore, Nepal dhe bashkëpunëtorët e tij kishin koordinuar aktivitetet e rrjetit, rekrutimin e anëtarëve dhe shfrytëzimin e të miturve në disa juridiksione.
Hetuesit amerikanë identifikuan më shumë se një duzinë bashkëpunëtorësh aktivë të lidhur me Nepal dhe Varagiannis. Dokumentet e çështjes përmendin të paktën tetë viktima të mitura, disa prej të cilave ishin vetëm 13 vjeç.
Nepal përballet me një dënim minimal të detyrueshëm prej 15 vjetësh dhe maksimal prej 30 vjetësh burg. Seanca për caktimin e dënimit është planifikuar për 5 mars 2027.
Sipas njoftimit të Departamentit amerikan të Drejtësisë, Varagiannis mbahej në burgun e Grevenës në Greqi dhe pritej të përballej me proces gjyqësor për akuza të lidhura me materialet e abuzimit seksual të fëmijëve dhe pjesëmarrjen në organizatë kriminale.
Ky rast dëshmon se hetimet kundër „764“ nuk janë të kufizuara brenda kufijve amerikanë, por kërkojnë bashkëpunim ndërmjet autoriteteve të disa shteteve.
Raste të dhunës fizike në Evropë
Rreziku nga ky ekosistem nuk përfundon në hapësirën digjitale. Disa raste të dokumentuara në Evropë tregojnë se manipulimi online mund të përfundojë edhe me sulme fizike.
Një nga rastet më shqetësuese është ai i Suedisë, ku një 14-vjeçar, i lidhur me komunitetet e dhunshme online, sulmoi me thikë një burrë të moshuar në zonën e Hässelby-t në Stokholm, më 13 shtator 2024.
Sipas analizës së West Point, sulmi u regjistrua dhe pamjet u shpërndanë në komunitete të lidhura me „764“ dhe „No Lives Matter“.
Studiuesit përshkruajnë se i mituri ishte manipuluar dhe ushtruar presion nga persona të tjerë të rrjetit.
Ky rast tregon një dimension tjetër të fenomenit: një fëmijë i manipuluar në internet mund të bëhet jo vetëm viktimë, por edhe autor i një akti të dhunshëm ndaj një personi tjetër.
Në Mbretërinë e Bashkuar dhe Holandë janë dokumentuar gjithashtu raste ku fëmijë janë kontaktuar nëpërmjet platformave të lojërave dhe rrjeteve sociale, për t’u shantazhuar më pas përmes komunikimeve private.
A është „764“ shpallur organizatë terroriste?
Një element tjetër që tregon seriozitetin e fenomenit është trajtimi i tij nga institucionet e sigurisë.
Kanadaja e përfshiu „764“ në listën e entiteteve terroriste në dhjetor 2025.
Klasifikimi lidhet me natyrën e dhunshme të rrjetit dhe veprimtarinë e tij që shkon përtej kriminalitetit të zakonshëm online.
Megjithatë, duhet bërë dallimi ndërmjet „764“, grupeve të lidhura me të dhe komunitetit më të gjerë „Com Network“. Nuk është e saktë të thuhet se të gjitha grupet dhe individët e këtij ekosistemi kanë automatikisht të njëjtin status juridik.
Po ashtu, klasifikimi në Kanada nuk nënkupton se „764“ është shpallur organizatë terroriste edhe në Maqedoninë e Veriut.
Çfarë po ndodh në Maqedoninë e Veriut?
20 nëntor 2026
Paralajmërimi i Ministrisë së Punëve të Brendshme e vendos këtë fenomen edhe në vëmendjen e institucioneve dhe opinionit publik në Maqedoninë e Veriut.
Më 20 nëntor, MPB-ja u bëri thirrje prindërve, mësuesve dhe kujdestarëve që të tregojnë kujdes ndaj aktiviteteve online të fëmijëve dhe të jenë të vëmendshëm ndaj shenjave të mundshme të manipulimit dhe shantazhit.
Sipas raportimit të televizionit Sitel, zëdhënësi i MVR-së, Goce Andreevski, bëri të ditur se po zhvillohen aktivitete për verifikimin dhe analizimin e informacioneve lidhur me raste që mund të kenë elemente të ngjashme me veprimtarinë e rrjetit „764“.
Ky është një detaj i rëndësishëm, sepse çështja nuk mbetet vetëm në nivelin e një paralajmërimi ndërkombëtar. Institucionet vendore kanë arsye të shqyrtojnë nëse ekzistojnë kontakte, viktima ose persona të përfshirë në aktivitete të ngjashme.
Megjithatë, deri në publikimin e këtij hulumtimi, nuk është bërë publik numri i rasteve që po verifikohen, nuk janë identifikuar zyrtarisht viktima të lidhura me „764“ në vend dhe nuk është konfirmuar ekzistenca e një strukture të organizuar të këtij rrjeti në territorin e Maqedonisë së Veriut.
Ky dallim është thelbësor: ekzistenca e një hetimi ose verifikimi nuk përbën provë se rrjeti ka krijuar një strukturë lokale.
Përgjigjet për këto pyetje pritet të vijnë nga MVR-ja dhe organet e tjera kompetente.
Cilat shenja duhet të njohin prindërit?
Sipas FBI-së dhe institucioneve që merren me mbrojtjen e fëmijëve, viktimat e manipulimit dhe shantazhit online mund të shfaqin ndryshime të dukshme në sjellje.
Ndër shenjat që meritojnë vëmendje janë:
- Fëmija fillon të fshehë telefonin ose aktivitetet në internet.
- Shfaq frikë ose ankth sa herë merr mesazhe.
- Izolohet nga familja dhe miqtë.
- Bëhet papritur shumë i rezervuar për komunikimet online.
- Merr mesazhe kërcënuese ose shantazhuese.
- Shfaq ndryshime të forta emocionale.
- Ka lëndime të pashpjeguara ose flet për vetëdëmtim.
- Shfaq frikë nga publikimi i fotografive ose informacioneve personale.
Këto shenja nuk dëshmojnë domosdoshmërisht se fëmija është viktimë e „764“. Ato mund të lidhen edhe me probleme të tjera emocionale, sociale ose familjare.
Për këtë arsye, ekspertët këshillojnë që prindërit të mos reagojnë me akuza, kërcënime ose ndëshkime. Fëmija duhet të ndiejë se mund të tregojë çfarë ka ndodhur pa pasur frikë se do të fajësohet.
Si mund të mbrohen fëmijët?
Mbrojtja nuk mund të mbështetet vetëm në ndalimin e përdorimit të telefonave ose lojërave online.
Komunikimi i vazhdueshëm ndërmjet prindërve dhe fëmijëve, edukimi për sigurinë digjitale dhe njohja e rreziqeve janë po aq të rëndësishme sa edhe kontrolli i cilësimeve të privatësisë.
Prindërit duhet t’u shpjegojnë fëmijëve se:
- Nuk duhet të ndajnë fotografi intime ose informacione personale me persona të panjohur.
- Një person që kërkon fshehtësi absolute nuk është domosdoshmërisht mik.
- Askush nuk ka të drejtë t’i kërcënojë ose t’i detyrojë të kryejnë veprime kundër vullnetit të tyre.
- Edhe nëse kanë dërguar fotografi ose kanë bërë diçka për të cilën pendohen, mund të kërkojnë ndihmë.
- Kërcënimet për publikimin e materialeve nuk duhet të trajtohen duke iu bindur kërkesave të abuzuesit.
Në rast dyshimi, rekomandohet ruajtja e mesazheve, emrave të përdoruesve dhe provave të tjera të komunikimit, pa i shpërndarë materialet eksplicite që paraqesin të mitur.
Rastet mund të raportohen në Sektorin për Krim Kompjuterik dhe Forenzikë Digjitale të MVR-së, në adresën:
MPB – Krimi kompjuterik
cybercrime@moi.gov.mk
Në rast rreziku të menjëhershëm, duhet kontaktuar menjëherë policia ose shërbimi emergjent.360 степени+1
Rreziku nuk është loja, por personi që fshihet pas profilit
Fenomeni „764“ dëshmon se kufiri ndërmjet botës virtuale dhe asaj reale është gjithnjë e më i paqartë kur bëhet fjalë për krimet ndaj fëmijëve.
Një lojë online mund të jetë vetëm pika e parë e kontaktit. Një bisedë private mund të shndërrohet në mjet manipulimi, ndërsa një fotografi e ndarë në mirëbesim mund të përdoret për shantazh dhe kontroll.
Për këtë arsye, përgjigjja institucionale nuk mund të kufizohet në paralajmërime të përgjithshme. Nevojiten hetime të specializuara, bashkëpunim ndërkombëtar, edukim digjital dhe mekanizma që u mundësojnë fëmijëve të raportojnë abuzimin pa frikë.
Rasti i „764“ tregon gjithashtu se autorët nuk janë gjithmonë persona të panjohur që veprojnë larg viktimave. Disa janë vetë të rinj, që përdorin identitete anonime, komunikime të koduara dhe komunitete virtuale për të ndërtuar rrjete abuzimi.
Paralajmërimi i MVR-së më 20 nëntor është një sinjal që nuk duhet shpërfillur. Por përtej alarmit publik, mbetet një pyetje që kërkon përgjigje konkrete nga institucionet: A ka fëmijë nga Maqedonia e Veriut që janë kontaktuar, manipuluar ose shantazhuar nga persona të lidhur me këtë rrjet dhe sa të përgatitura janë institucionet për t’i mbrojtur ata?
Burimet kryesore: FBI, Departamenti i Drejtësisë i SHBA-së, Institute for Strategic Dialogue (ISD), Combating Terrorism Center – West Point, PERIL dhe Ministria e Punëve të Brendshme e Maqedonisë së Veriut. Flaka. Të dhënat për arrestimet e Com Network nuk duhen interpretuar si statistika vetëm për grupin 764.















