Dimitrievski: Krijuesi i problemeve nuk duhet të jetë edhe krijues i zgjidhjeve

Dialogu në politikë është i domosdoshëm dhe gjithmonë i mirëpritur, tha Maksim Dimitrievski, kryetar i Lëvizjes ZNAM, duke komentuar takimin e djeshëm mes kryeministrit Hristijan Mickoski dhe liderit të LSDM-së, Venko Filipçe. Sipas Dimitrievskit, është e nevojshme të ketë komunikim politik, por shtoi se ata që kanë kontribuar në krijimin e situatës aktuale nuk duhet të kenë mundësinë të jenë pjesë e zgjidhjeve.

“Të njëjtët individë që na sollën në këtë situatë nuk duhet të kenë mundësinë të krijojnë zgjidhje. Ne kemi një qeveri legjitime dhe stabile, e cila ka shumicën absolute dhe është përgjegjëse për gjetjen e zgjidhjeve,” theksoi ai në një intervistë për Ditarin e Tv Sitell.

Maksim Dimitrievski kritikoi liderin e LSDM-së, Venko Filipçe, duke e akuzuar për “hipokrizi të pastër”, duke shtuar se Filipçe po mundohet të pozicionohet si lider i opozitës, ndonëse është vetëm kryetar i një partie politike opozitare. Ai gjithashtu nuk përjashtoi mundësinë që liderë të tjerë opozitarë mund të kërkojnë “forma të tilla të dialogut” në të ardhmen.

Sa i përket mundësisë së një takimi të lidershipit, Dimitrievski nuk e përjashtoi mundësinë e pjesëmarrjes së tij, megjithatë theksoi se takime të tilla janë më tepër debate mes përfaqësuesve politikë, ndërsa qeveria duhet të mbajë përgjegjësinë për të gjitha veprimet dhe vendimet që merren.

Duke komentuar përplasjet ndërmjet nënkryetarit të Kuvendit, Antonio Milloshoski, dhe ministrit të Drejtësisë, Igor Filkov, Dimitrievski i konsideroi ato si shprehje dhe qëndrime personale. Ai theksoi se VMRO-DPMNE dhe Lëvizja ZNAM nuk kanë ndonjë çështje të hapur që mund të prishë funksionimin e qeverisë dhe shumicës parlamentare.