UT organizoi Akademi përkujtimore për të nderuar jetën dhe veprën e Prof. Dr. Asllan Bilallit

Fakulteti Juridik i Universitetit të Tetovës, sot organizoi Akademi përkujtimore në nderim të jetës dhe veprës së Prof. Dr. Asllan Bilallit.

Dekani i Fakultetit Juridik, Prof. Dr. Safet Emruli tha se profesor Bilalli ishte një jurist, me një karrierë të gjatë në fushën e së drejtës ndërkombëtare private dhe së drejtës romake. “Ai ka kontribuar ndjeshëm në zhvillimin e arsimit juridik në rajon dhe ka qenë i angazhuar në institucione të rëndësishme akademike dhe gjyqësore. Për më shumë se 40 vjet, ai i qëndroi besnik fjalës, ligjit dhe Universitetit, duke formësuar mendimin juridik në Kosovë dhe në Maqedoni me përkushtim, integritet dhe dinjitet. Ligjëratat e tij nuk ishin vetëm mësime teorike, por udhërrëfyes për jetën dhe profesionin. Ai na mësoi se drejtësia nuk është vetëm një koncept, por një angazhim i përditshëm për të ndërtuar një shoqëri më të mirë.” – tha dekani i Fakultetit Juridik, Prof. Dr. Safet Emruli.
Biografinë e profesor Asllan Bilallit e paraqiti profesori i Fakultetit Juridik, Prof. Dr. Arbër Ademi. Ai e quajti profesor Asllan Bilallin figurë emblematike dhe të rëndësishme të botës akademike shqiptare, jo vetëm në Kosovë, por edhe në Maqedoninë e Veriut, i cilii dha kontribut të çmuar në zhvillimin e arsimit, në themelimin e universiteteve dhe në formësimin e mendimit juridik shqiptar.

Në emër të familjes së të ndjerit, foli i biri i tij, Bilall Bilalli, i cili e falënderoi Universitetin e Tetovës, duke theksuar se babai i tij ia ka kushtuar jetën këtij universiteti dhe arsimit.

Në këtë Akademi përkujtimore, të pranishëm ishin profesorë, kolegë, ish-studentë, përfaqësues të institucioneve, familjarë dhe miq të cilët erdhën për të kujtuar kontributin e jashtëzakonshëm të Prof. Dr. Asllan Bilallit në fushën e drejtësisë dhe të arsimit.