Ibrahimi shpall VLEN-in si “argat të popullit” – retorikë e njohur, rezultate të paqarta

Zeqirija Ibrahimi, një nga drejtuesit e VLEN-it, në intervistën e fundit për Ora24.tv u përpoq ta paraqesë këtë subjekt si një formacion të hapur, popullor dhe në shërbim të qytetarëve. Ai deklaroi se politikanët janë “argatë të popullit” dhe se çdo qytetar ka të drejtë t’u kërkojë shërbime funksionarëve të VLEN-it. Por përtej deklaratave me tone popullore, lindin pyetje serioze mbi efektshmërinë dhe sinqeritetin e këtyre premtimeve, transmeton Flaka Media

Ibrahimi flet për një qeverisje që “lë gjurmë”, për zgjidhje të shpejta të çështjeve infrastrukturore si kufijtë në Bllacë e Tabanoc, dhe për një qasje të hapur ndaj kritikës. Megjithatë, deri më tani, shumë prej këtyre çështjeve kanë mbetur në nivel të deklaratave politike, pa ndonjë mekanizëm të qartë llogaridhënieje ndaj qytetarëve.

Më tej, Ibrahimi thotë se VLEN është i gatshëm të mbështesë kandidatë jashtë partisë, madje edhe nga shoqëria civile apo fusha të tjera, por nuk sqaron se cilat janë kriteret reale të përzgjedhjes, dhe nëse kjo hapje është një reflektim i vërtetë demokratik apo një përpjekje për ta gërryer elektoratin e pakënaqur.

Ndërkohë, në lidhje me deputetët e Aleancës për Shqiptarët, Ibrahimi jep sinjale të qarta politike duke i ftuar që të mos e ndjekin Taravarin dhe të mbeten në VLEN, duke thënë se nuk është “tradhti” po qëndrim ndaj votuesve. Kjo nxit debat mbi etikën politike dhe përfaqësimin: A po i ftohen deputetët të shkëputen nga partia që i solli në Kuvend për interesa të një koalicioni të përkohshëm?

Në një kohë kur qytetarët janë gjithnjë e më të lodhur nga premtimet dhe pakësimi i besimit në politikë, deklaratat e Ibrahimit janë një përzierje mes retorikës idealiste dhe kalkulimit politik. Koha do të tregojë nëse VLEN është me të vërtetë “në shërbim të qytetarëve” apo vetëm një fasadë e radhës për lojë pushteti. Flaka Media