EDITORIAL: Kur legjitimiteti politik në pushtet mbetet pa shumicë shqiptare

Editorial nga Redaksia Flaka

Deklaratat e fundit të përfaqësuesve të VLEN-it, Bekim Qokut dhe Izet Mexhitit, rihapën një debat të vjetër, por shumë të rëndësishëm për demokracinë dhe përfaqësimin politik në Maqedoninë e Veriut: Çfarë është legjitimiteti dhe kush e jep atë? Në një kohë kur kampi politik shqiptar në pushtet përfaqësohet nga 9 deputetë, ndërsa opozita shqiptare ka 22, vetë nocioni i përfaqësimit del i cunguar. A është kjo një qeverisje me mbështetjen e popullit, apo një marrëveshje teknike për të ruajtur pozita?

Bekim Qoku përpiqet të relativizojë “legjitimitetin e numrave”, duke theksuar se edhe ndërtimi i një kanalizimi apo ujësjellësi në qytetin ku jeton mund të jetë formë e legjitimitetit. Mirëpo, ky relativizim shndërrohet në një arsyetim që i shërben mungesës së përkrahjes reale. Në një demokraci funksionale, shifra e votave dhe përfaqësimi proporcional janë themeli i legjitimitetit, ashtu siç e thonë edhe filozofët politikë nga John Locke deri te Robert Dahl.

Izet Mexhiti përpiqet të shtyjë narrativën se VLEN nuk është pjesë e qeverisë për aritmetikë politike, por për “përfaqësim të drejtë të shqiptarëve”. Megjithatë, a mund të ketë përfaqësim të drejtë kur shumica dërmuese e deputetëve shqiptarë ndodhen në opozitë? Kjo është pikërisht ajo që po e konteston opinioni publik shqiptar: një qeverisje që përjashton shumicën shqiptare nuk mund të ketë legjitimitet moral, as politik.

Nëse legjitimiteti i një qeverie është si një rezervuar (siç thotë Robert Dahl), atëherë rezervuari i VLEN-it po zbrazet shpejt. Nuk mjafton vetëm emri shqiptar i një ministri, as një marrëveshje pas dyerve të mbyllura. Legjitimiteti i vërtetë ndërtohet mbi vullnetin e shprehur të shumicës së qytetarëve shqiptarë në vend, të cilët këtë herë e kanë dhënë fjalën e tyre për opozitën.

Në një kohë kur rajoni përballet me trazira, manipulime dhe zhgënjime politike, është momenti që përfaqësuesit politikë të ndalin arsyetimet e zbrazëta dhe të dëgjojnë zërin e popullit. Sepse pa legjitimitet, pushteti është veç një iluzion i përkohshëm që rrëzohet me frymën e parë të revoltës demokratike.