Pse heshtin partitë shqiptare? Nerova kërkon mbrojtje, jo heshtje politike!

Ndërkohë që banorët shqiptarë të fshatit Nerovë të komunës së Krushevës po përballen me një padrejtësi të hapur nga ana e institucioneve shtetërore, partitë politike shqiptare në pushtet dhe opozitë po zgjedhin heshtjen. Asnjë reagim i fuqishëm, asnjë qëndrim zyrtar i prerë nuk është dhënë për rastin e shkollës që kërcënohet me rrënim vetëm pse është ndërtuar me vetëfinancim nga banorët, pa lejen e shtetit që për vite të tëra i injoroi, shkruan Flaka

Banorët e Nerovës ndërtuan një objekt shkollor me duart e tyre, për të siguruar të drejtën e fëmijëve për të mësuar në gjuhën amtare, ndërkohë që shteti as nuk ndërtoi, as nuk ndihmoi. Tani, i njëjti shtet, me pretekstin e “ndërtimit pa leje”, kërkon të shembë këtë shkollë – një akt që qytetarët e përjetojnë si goditje ndaj dijes, gjuhës dhe identitetit.

Në këtë situatë dramatike, shtrohet pyetja: Pse heshtin partitë shqiptare?

Përfaqësuesit politikë që shpesh vetëquhen “mbrojtës të interesave shqiptare” nuk kanë marrë asnjë hap konkret për të ndalur rrënimin, për të ofruar zgjidhje ligjore ose për të dalë në terren e të takohen me banorët. Heshtja e tyre është jo vetëm zhgënjyese, por edhe politike dhe morale.

A janë më të rëndësishme koalicionet dhe pazaret politike sesa shkollat dhe e drejta për arsimim? A është një objekt shkollor në gjuhën shqipe kaq i padukshëm për partitë që sot janë pjesë e institucioneve?

Banorët e Nerovës nuk kërkuan luks – kërkuan arsim. Nuk ndërtuan përfitime personale – ndërtuan një shkollë për të ardhmen e fëmijëve. Dhe në vend të mirënjohjes, u kthye shpatulla dhe kërcënimi me buldozer.

Kjo situatë kërkon zgjidhje, por mbi të gjitha kërkon zë, mbrojtje, ndërhyrje urgjente. Heshtja e partive politike shqiptare vetëm sa nxit mosbesimin dhe thellon bindjen se për qytetarët e thjeshtë, nuk ka përfaqësim të vërtetë.

Nerova nuk duhet të mbetet e vetme. Partitë shqiptare duhet të flasin, të veprojnë dhe të mbrojnë atë që është më e shenjta: dijen dhe të drejtën për arsimim në gjuhën amtare. Flaka