Ahmeti pret Ambasadorin çek: Integrimi europian mbetet prioritet

Lideri i Bashkimit Demokratik për Integrim (BDI), Ali Ahmeti, ka pritur sot në zyrën e tij Ambasadorin e Republikës së Çekisë në Shkup, z. Jaroslav Ludva, me të cilin ka diskutuar mbi zhvillimet politike dhe procesin e integrimit europian të Maqedonisë së Veriut, njofton Flaka

Ahmeti e vlerësoi këtë proces si një prioritet absolut, jo vetëm për BDI-në dhe shqiptarët, por për të gjithë qytetarët e vendit.

“Integrimi europian nuk duhet të mbetet një kauzë e njëanshme. Duhet të jetë një prioritet i përbashkët i të gjithë faktorëve politikë dhe institucionalë,” – u shpreh lideri i BDI-së.

Në këtë kontekst, ai theksoi nevojën për reforma të thella sistemore, që do të garantonin drejtësi dhe barazi për të gjithë, përfshirë:

• Vetingun e politikanëve, gjykatësve dhe prokurorëve, nën mbikëqyrje ndërkombëtare,
• Verifikimin e pasurisë dhe pronës së çdo politikani,
• Hetimin e procesit të privatizimit dhe ndikimit të tij në krijimin e oligarkisë.

“Këto janë hapa të domosdoshëm për të ndërtuar një shtet me drejtësi të paanshme, sundim të ligjit dhe institucione që i shërbejnë qytetarëve, jo interesave politike,” – deklaroi Ahmeti.

Ai ritheksoi se integrimi europian nuk ka alternativë dhe se është rruga e vetme drejt stabilitetit, zhvillimit dhe barazisë së plotë për të gjithë.

Takimi me ambasadorin Ludva shënon një tjetër hap në përpjekjet e BDI-së për të theksuar angazhimin e saj të palëkundur ndaj rrugës euro-atlantike të vendit dhe nevojës për transformim të thellë institucional. Flaka