Xhelili: Pa unifikim, shqiptarët rrezikojnë të mbeten në periferi të vendimmarrjes

Deklaratat e fundit të kryeministrit Hristijan Mickoski, i cili tha se “nuk do të lëvizë asnjë milimetër” në kontestin me Bullgarinë, kanë shkaktuar shqetësim në qarqet politike shqiptare. Në një prononcim për Agjencinë e lajmeve Flaka, profesori dhe analisti Zudi Xhelili thekson nevojën urgjente për unifikimin e faktorit politik shqiptar në Republikën e Maqedonisë së Veriut, shkruan Flaka

“Kjo nuk është thjesht një çështje politike ditore, por një dilemë për të ardhmen strategjike të RMV-së. Shqiptarët, si faktor shtetformues, duhet të kenë qëndrim të unifikuar, të vendosur dhe proaktiv,” deklaroi Xhelili.

Ai vlerëson se partitë shqiptare, pas zgjedhjeve parlamentare të majit 2024, nuk kanë arritur të dalin me një qëndrim të përbashkët, gjë që ka dobësuar ndikimin e tyre në procesin e formimit të qeverisë.

“Nëse shqiptarët nuk veprojnë si një bllok i koordinuar, rrezikojnë të mbeten në periferi të vendimmarrjes, edhe pse përbëjnë një përqindje të konsiderueshme të popullsisë,” tha Xhelili për Flaka.

Sipas tij, përballë forcimit të VMRO-DPMNE-së dhe rritjes së retorikës nacionaliste, ekziston rreziku real për regres në të drejtat e fituara nga shqiptarët pas Marrëveshjes së Ohrit.

“Shumë çështje mbeten të pazgjidhura, edhe pse kanë kaluar më shumë se dy dekada nga Marrëveshja e Ohrit. Vetëm një front i bashkuar shqiptar mund të garantojë që të mos ketë kthim prapa,” thekson Xhelili.

Duke komentuar edhe sfidat në procesin e integrimit evropian të vendit, ai thekson rolin që shqiptarët mund të luajnë si faktor stabiliteti dhe orientimi perëndimor.

“Shqiptarët janë faktor pro-perëndimor. Ata mund të kenë rol kyç në procesin euro-integrues, por vetëm nëse veprojnë të bashkuar dhe e kushtëzojnë pjesëmarrjen në çdo qeveri me përparimin drejt BE-së dhe respektimin e marrëveshjeve ndërkombëtare,” u shpreh Zudi Xhelili.

Në përfundim, Xhelili thekson se unifikimi i spektrit politik shqiptar nuk është më opsion, por domosdoshmëri historike për të garantuar të drejtat kolektive, për të rritur peshën politike dhe për të siguruar rolin shtetformues të shqiptarëve në RMV.

Në një kohë kur Maqedonia e Veriut përballet me sfida të mëdha të brendshme dhe ndërkombëtare, mes tensioneve ndëretnike, stagnimit në procesin e integrimit evropian dhe forcimit të retorikës nacionaliste, unifikimi i faktorit politik shqiptar shfaqet si një domosdoshmëri, jo vetëm politike por edhe historike.

Siç thekson Zudi Xhelili, vetëm përmes një qëndrimi të përbashkët, shqiptarët mund të mbrojnë të drejtat e fituara, të rrisin ndikimin në vendimmarrje dhe të luajnë rolin që u takon si faktor shtetformues e strategjik në orientimin euroatlantik të vendit. Pa këtë unifikim, ekziston rreziku real që shqiptarët të mbeten thjesht partnerë elektoralë, e jo aktorë të barabartë në ndërtimin e së ardhmes së përbashkët. Flaka Media