ASH: Azir Aliu propozoi vetë heqjen e balancuesit – VLEN është bërë zgjatim i VMRO-së

Aleanca për Shqiptarët ka reaguar ashpër ndaj qëndrimeve të fundit të ministrit Azir Aliu, duke e akuzuar se po tenton të paraqitet si mbrojtës i përfaqësimit të drejtë në administratë, ndërkohë që vetë ka qenë propozues i eliminimit të sistemit të balancuesit gjatë mandatit të tij në vitin 2023, transmeton Flaka

“Në kundërshtim me qëndrimet e djeshme, Azir Aliu – gjatë mandatit të tij si Ministër për Shoqëri Informatike dhe Administratë – ka propozuar heqjen e sistemit të balancuesit, një mjet kyç për përfaqësimin e drejtë të komuniteteve në administratën publike,” thuhet në reagimin zyrtar të ASH-së.

Partia citon dokumentin zyrtar të datës 11 korrik 2023, ku Qeveria miratoi Strategjinë për Reformën e Administratës Publike 2023–2030 dhe Planin e Veprimit 2023–2026. Në këtë dokument, sipas ASH-së, thuhet qartë:

“Tejkalohet nevoja e aplikimit të mjetit balancuesit, i cili në praktikë shkakton keqpërdorime të shumta.”

Sipas deklaratës, vetë Azir Aliu kishte pohuar publikisht se:

“Sipas meje, gjatë kësaj periudhe tranzitore, sistemi i meritës duhet të jetë në vend të parë… Ne duhet të ecim në atë drejtim, për hir të vetes, ne jetojmë këtu.”

ASH thekson se heqja e balancuesit më vonë u përfshi edhe në programin e VMRO-DPMNE-së “Platforma 1198”, si kusht për bashkëqeverisje.

“Azir Aliu nuk mund të paraqitet sot si mbrojtës i balancuesit, kur dokumentet dhe qëndrimet zyrtare tregojnë se ai ka qenë një nga propozuesit e drejtpërdrejtë të eliminimit të tij, duke hapur rrugë për një administratë publike pa garanci për përfaqësim të drejtë të komuniteteve,” thuhet në reagim.

ASH ngre pyetjen për liderët e koalicionit VLEN:

“Kush po ju pengon ta sillni në Kuvend ligjin për përfaqësim të drejtë dhe adekuat? Tani që kaluan gati një muaj nga largimi i ASH-së nga qeveria, ranë edhe pretendimet e Kasamit dhe Mexhitit – se kinse Arben Taravari ka vonuar miratimin e ligjit të ri.”

Në fund, Aleanca për Shqiptarët e mbyll reagimin me një akuzë direkte ndaj partnerëve të rinj qeveritarë të VMRO-së:

“VMRO-DPMNE është faktori real që po stagnon ligjin për përfaqësim të drejtë. Po nuk e thonë dot këtë, sepse sot janë bërë vegël e saj politike – një zgjatim pa legjitimitet, që nuk përfaqëson më interesin shqiptar.” Flaka