Taravari: “Edhe nëse na kërcënojnë, gjuha shqipe do të dëgjohet më shumë – është gjuha e parë e kësaj toke!”

 Arben Taravari, lideri i Aleancës për Shqiptarët dhe kryetar i Komunës së Gostivarit, ka lëshuar një deklaratë të fortë përmes rrjeteve sociale, duke komentuar zhvillimet e fundit politike që lidhen me të drejtat gjuhësore të shqiptarëve në Maqedoninë e Veriut, transmeton Flaka

Duke bashkëngjitur një sekuencë nga filmi historik Nëntori i Dytë, Taravari u shpreh:

“Mund të kërcënojnë me shkarkime nëse flasim shqip, por edhe më shumë do të dëgjohet gjuha shqipe – gjuha e parë e kësaj toke!”

Sekuenca filmike që shoqëron postimin tregon momentin kur Ismail Qemali, gjatë udhëtimit drejt Vlorës për shpalljen e Pavarësisë së Shqipërisë, përballet me një çetë turke. Udhëheqësi i saj jep urdhër që ai të dorëzohet, por Ismail Qemali i fton ushtarët të bashkohen në rrugëtimin e tij për liri. Shumica e tyre, që ndjejnë gjakun shqiptar në damarë, dezertojnë nga radhët e beut dhe i bashkohen misionit të Ismail Qemalit.

Simbolika e fortë në kohë tensioni

Kjo deklaratë vjen në një kohë kur në opinion po shtohen zërat për shtypje administrative ndaj përdorimit të gjuhës shqipe, sidomos në institucionet shtetërore. Në këtë kontekst, Taravari duket se ka zgjedhur të japë një mesazh rezistence dhe krenarie, duke lidhur aktualitetin me historinë.

Filmi Nëntori i Dytë është prodhuar në vitin 1982 nga Kinostudioja “Shqipëria e Re” dhe është një nga kryeveprat e kinematografisë shqiptare. Me regji të Viktor Gjikës dhe skenar nga Dhimitër Shuteriqi dhe Kiço Blushi, ai sjell për publikun rrugëtimin e Ismail Qemalit dhe bashkëpunëtorëve të tij drejt shpalljes së Pavarësisë më 28 Nëntor 1912.

Përballje me realitetin aktual

Mesazhi i Taravarit nuk është vetëm simbolik, por duket se ka për qëllim të mobilizojë opinionin publik shqiptar në Maqedoninë e Veriut kundër çdo përpjekjeje për të minimizuar gjuhën dhe identitetin shqiptar në sferën publike.

Në fund, ai lë të kuptohet se gjuha shqipe nuk do të heshtet – përkundrazi, ajo do të dëgjohet edhe më shumë. Flaka Media