ASH: E qartë – Mickoski dhe VLEN po shtyjnë Ligjin për Përfaqësim drejt një agonie pa fund

Aleanca për Shqiptarët ka reaguar me shqetësim të thellë ndaj marrëveshjes së fundit ndërmjet kryeministrit Hristijan Mickoski dhe partnerëve të koalicionit VLEN, që projektligji për Përfaqësim të Drejtë dhe Adekuat të dërgohet drejtpërdrejt për vlerësim në Komisionin e Venecias, pa kaluar më parë në Kuvend.

Sipas kësaj marrëveshjeje, projektligji do të kalojë fillimisht në Qeveri dhe më pas do t’i nënshtrohet shqyrtimit ndërkombëtar, para se të hynte në procedurë parlamentare – një qëndrim me të cilin janë pajtuar liderët e VLEN-it, Bilall Kasami dhe Izet Mexhiti. Ata e arsyetojnë këtë hap si mënyrë për të shmangur problemet që ndodhën me Ligjin për Përdorimin e Gjuhëve, i cili u bllokua për vite në Gjykatën Kushtetuese.

Por, Aleanca për Shqiptarët e kundërshton këtë qasje, duke e cilësuar si “të gabuar dhe të rrezikshme”, dhe paralajmëron për pasoja serioze në fushën e barazisë dhe të përfaqësimit institucional.

“Kjo qasje bie ndesh me përvojën e hidhur që vendi ka pasur me Ligjin për Gjuhët. Opinioni i Komisionit të Venecias për atë ligj u kthye pas gjashtë vitesh pritje – dhe nuk kemi luksin të përsërisim këtë precedent,” thuhet në reagimin zyrtar të partisë.

Sipas Aleancës, vendi tashmë ndodhet në një boshllëk të rrezikshëm ligjor pas vendimit të Gjykatës Kushtetuese për ta shfuqizuar sistemin e balancerit në punësimet publike. Kjo, sipas tyre, ka sjellë pasoja të rënda dhe diskriminim të hapur në administratë.

“Në konkurset e fundit, raporti i pranimeve është 20 me 0 në dëm të shqiptarëve. Këto janë shkelje flagrante që rrezikojnë rëndë harmoninë ndëretnike në vend,” thekson Aleanca.

Partia kërkon që projektligji të miratohet fillimisht në Kuvend, si një akt sovraniteti ligjvënës, dhe vetëm më pas të dërgohet për opinion në Komisionin e Venecias.

“Vetëm kështu mund të shmangim vonesat e pafundme procedurale, të garantojmë mbrojtjen reale të barazisë qytetare dhe të ndalojmë keqpërdorimin e punësimeve si instrument politik dhe etnik.”

Në përfundim të deklaratës, Aleanca për Shqiptarët thekson se do të mbetet e palëkundur në mbrojtjen e të drejtave të qytetarëve shqiptarë dhe të çdo komuniteti tjetër në vend, duke mos lejuar që mekanizmat ndërkombëtarë të përdoren si justifikim për bllokimin e barazisë reale në shtet. Flaka Media