BDI: Qeveria po i shërben narrativave ruse – precedent i rrezikshëm kundër NATO-s

Bashkimi Demokratik për Integrim ka reaguar ashpër ndaj, siç i quan, “veprimeve hibride” të përfaqësuesve të Qeverisë së re, të cilët, sipas BDI-së, po promovojnë hapur narrativa ruse dhe serbe në emër të institucioneve shtetërore.

“Po asistojmë në një precedent të rrezikshëm institucional, ku në emër të Qeverisë promovohen dhe mbrohen narrativa që përfaqësojnë qartazi ndikimin rus dhe atë të ‘botës serbe’ në vend,” thuhet në deklaratën e BDI-së të publikuar sot.

BDI vlerëson se ky zhvillim përbën përplasje të drejtpërdrejtë me vlerat dhe qëndrimet e Aleancës Veri-Atlantike.

“Ky precedent përbën një përplasje të drejtpërdrejtë me qëndrimet e NATO-s dhe me drejtimet e qarta të përcaktuara në deklaratat e miratuara me konsensus nga Këshilli i Aleancës Veri-Atlantike, për të cilat deri më sot kanë votuar rregullisht edhe përfaqësuesit tanë,” thuhet më tej në reagimin e partisë.

Në qendër të kritikave të BDI-së është zëvendëskryeministri Ivan Stoilkovik, të cilin ata e akuzojnë për diskriminim etnik dhe afërsi me qëndrime proruse.

“Zëvendëskryeministri, i cili në mënyrë ironike është përgjegjës për zbatimin e Marrëveshjes Kornizë të Ohrit, dhe që urdhëron shkarkimin e shqiptarëve nga pozita të larta në administratë, gëzon qartazi mbështetjen e Kryeministrit Hristijan Mickoski për të gjitha veprimet e tij,” deklaron BDI, duke përkujtuar rastet e mëparshme kur Stoilkovik “ndante kartonë të verdhë për shqiptarët e shënjestruar si ‘të pjekur për shkarkim’”.

Sipas tyre, kulmi i këtij devijimi politik u pa në një aktivitet të fundit ku Stoilkovik përfaqësoi Qeverinë “duke qëndruar krah për krah me ambasadorët e Rusisë, Kinës dhe vendeve të tjera partnere strategjike të tyre”, në një kontekst që, sipas BDI-së, përmbante edhe mesazhe pro-agresionit rus ndaj Ukrainës.

“Kryeministri u shfaq sërish në rolin e relativizuesit të këtij trendi të rrezikshëm, duke e mbrojtur të preferuarin e tij në Qeveri,” vlerësojnë nga BDI.

Në përfundim të deklaratës, BDI paralajmëron për rrezikun e “normalizimit të një ndryshimi të politikës zyrtare të shtetit”, që sipas tyre, synon largimin nga orientimi euroatlantik dhe afrimin me qendrat e fuqisë politike të udhëhequra nga Pekini dhe Moska. Flaka Media