BDI përfundon mbledhjen: Mbështetje e plotë për Ali Ahmetin – Thirrje për unifikim
Botuar nga Flaka
Ka përfunduar mbledhja e Kryesisë së Bashkimit Demokratik për Integrim, e mbajtur në selinë qendrore të partisë në Reçicë të Vogël. Sipas njoftimit zyrtar të partisë, në këtë takim është zhvilluar një “debat thelbësor” mbi sfidat politike që i presin shqiptarët në vend, të cilat u cilësuan si një “referendum i vërtetë” për të ardhmen.
“A do të mbrojmë vlerat e barazisë, dinjitetin institucional të komunitetit shqiptar dhe perspektivën evropiane, apo do të normalizojmë poshtërimin, margjinalizimin dhe izolimin?”, thuhet në komunikatën e BDI-së.
Në përfundim të debatit, Kryesia e partisë vendosi njëzëri t’i japë përkrahje të plotë liderit Ali Ahmeti, për – siç theksohet – intensifikimin e përpjekjeve për unifikimin e të gjitha forcave progresive, si brenda Frontit Evropian, ashtu edhe në Frontin Kombëtar, me synimin e qartë për “fitoren e madhe të përbashkët” në zgjedhjet e ardhshme.
Kjo mbledhje vjen në një moment kyç për pozicionimin politik të partive shqiptare në Maqedoninë e Veriut, ndërsa BDI thekson se është e vendosur për të udhëhequr procesin e konsolidimit politik në emër të stabilitetit, integrimit evropian dhe barazisë reale. Flaka Media
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
