Lazami nga Gostivari: Kauza kombëtare është mbi interesin partiak

Shefi i shtabit politik të Aleancës për Shqiptarët në Gostivar, Isak Lazami, deklaron se partia po shndërrohet në një lëvizje që ka në qendër interesin kombëtar, raporton Flaka

Aleanca për Shqiptarët vazhdon takimet me qytetarët në kuadër të rifreskimit dhe organizimit të strukturave në terren. Nga Gostivari, Isak Lazami – shefi i shtabit politik të ASH në këtë qytet – theksoi se angazhimi i deritanishëm ka tejkaluar suazat partiake dhe është bërë një lëvizje me vizion kombëtar.

“Ne kemi takuar mbi 500 aktivistë gjatë tre-katër javëve të fundit. Kemi themeluar 22 shtabe lokale. Kemi folur për ndodhitë e fundit politike dhe konstatimi ynë është i qartë: kjo nuk është më thjesht një strukturë politike, por një lëvizje në shërbim të interesit të përbashkët,” deklaroi Lazami.

Sipas tij, Aleanca për Shqiptarët po vendos mbi të gjitha interesin kombëtar.

“Kemi vendosur interesin kombëtar para atij politik e partiak, dhe e falënderoj kryetarin që ndërmori këtë hap së bashku me të gjitha forumet e partisë. Ky është një vizion që na bashkon dhe na forcon,” shtoi ai.

Lazami bëri thirrje për unitet dhe mobilizim të përgjithshëm në funksion të kauzës së përbashkët:

“Ne duhet të jemi të bashkuar dhe të punojmë fort për kauzën tonë të përbashkët. Ky është momenti për të dëshmuar se angazhimi ynë nuk është për karrige, por për të ardhmen e shqiptarëve në këtë vend.” Flaka Media