VLEN: Hetim për manipulim të qëllimshëm me numrin e shqiptarëve

Koalicioni VLEN njofton se do të dorëzojë një kallëzim penal në Prokurorinë Themelore Publike – Shkup, kundër ish-udhëheqësisë së Entit Shtetëror për Statistikë, si dhe ndaj personave të tjerë përgjegjës dhe drejtues në ish-Qeverinë e udhëhequr nga BDI dhe LSDM, përfshirë edhe figura të tjera nga koalicioni i atëhershëm qeveritar.

Sipas VLEN-it, ekzistojnë dyshime serioze për marrëveshje politike lidhur me Regjistrimin e popullsisë së vitit 2021, me ç’rast dyshohet se është kryer vepra penale Keqpërdorim i pozitës dhe autorizimit zyrtar, e dënueshme sipas nenit 353 të Kodit Penal të Maqedonisë së Veriut.

“Pasojat e këtij manipulimi janë të rënda dhe afatgjata,” thuhet në njoftim. “Numri i shqiptarëve të paraqitur në shumë vendbanime është ulur ndjeshëm dhe qëllimisht, duke i mohuar shqiptarëve të drejta themelore kushtetuese, si punësimi, përfaqësimi dhe barazia gjuhësore.”

VLEN thekson se si rezultat i këtyre të dhënave të manipuluara, institucionet shtetërore kanë marrë vendime mbi ndarjen e mjeteve dhe fondeve publike në mënyrë të gabuar, duke dëmtuar shumë qytetarë në komuna të ndryshme.

Më tej, koalicioni sjell në vëmendje se vetë zyrtarë të lartë të BDI-së kanë pranuar publikisht se regjistrimi ishte pjesë e një marrëveshjeje politike, duke forcuar edhe më tej dyshimet për një skenar të organizuar politik gjatë gjithë operacionit statistikor.

“VLEN ndërmerr këtë iniciativë në mbrojtje të ligjshmërisë, barazisë dhe pasqyrës reale statistikore të shtetit,” thuhet në reagim. “Presim nga Prokuroria një hetim të menjëhershëm dhe të plotë, pa asnjë kompromis, sepse është prekur dinjiteti dhe numri i popullatës sonë.”

VLEN mbyll njoftimin duke theksuar se lufta për drejtësi sapo ka filluar dhe do të vazhdojë deri në fund, në interes të të gjithë qytetarëve të Maqedonisë së Veriut. Flaka