Murtazani: Mbështetja e Francës, çelës për suksesin eurointegrues të Maqedonisë së Veriut

Ministri për Çështje Evropiane i Maqedonisë së Veriut, Orhan Murtazani, ka nisur vizitën zyrtare në Francë me një takim të rëndësishëm në Paris me Benjamin Haddad, ministër i obliguar për Çështje Evropiane në Ministrinë për Evropën dhe Punët e Jashtme të Francës.

Takimi u zhvillua në kuadër të realitetit të ri gjeopolitik në Evropë, ku partneriteti mes dy vendeve po merr një dimension të ri, me fokus në përshpejtimin e integrimit evropian të Maqedonisë së Veriut, rritjen e qëndrueshmërisë demokratike dhe forcimin e rezistencës ndaj ndikimeve të jashtme.

Në qendër të diskutimeve ishin perspektivat e zgjerimit të BE-së në Ballkanin Perëndimor, avancimi i bashkëpunimit dypalësh dhe koordinimi për çështje të ndjeshme politike dhe të sigurisë. Ministri Murtazani theksoi se Maqedonia e Veriut mbetet e përkushtuar në rrugën reformuese dhe në promovimin e fqinjësisë së mirë dhe bashkëpunimit rajonal.

“Na nevojitet përkushtimi i Francës për të arritur sukses të përbashkët dhe përparim vendimtar drejt konsolidimit të Evropës në këto kohë turbulente gjeopolitike”, deklaroi ministri Murtazani.

Gjatë takimit, palët u dakorduan që dialogu politik, shkëmbimet ekonomike dhe bashkëpunimi kulturor do të jenë prioritete kyçe për të dy vendet. U theksua gjithashtu rëndësia e pranisë franceze përmes ekspertëve teknikë në institucionet maqedonase – një ndihmesë konkrete në proceset reformuese dhe në harmonizimin me legjislacionin e BE-së.

Ministri francez Haddad riafirmoi mbështetjen e fuqishme të Francës për perspektivën evropiane të Maqedonisë së Veriut, duke vlerësuar progresin e bërë dhe gatishmërinë për reforma të qëndrueshme.

Në kuadër të vizitës, u diskutuan edhe mundësitë për rritjen e investimeve franceze në sektorë kyç si energjetika, transformimi digjital, infrastruktura dhe arsimi. Murtazani nënvizoi gatishmërinë e Qeverisë për të thelluar partneritetin institucional me Francën, duke e konsideruar Parisin një aleat strategjik të pazëvendësueshëm në rrugëtimin drejt Bashkimit Evropian. Flaka