30 lidhje ilegale në ditë në rrjetin e ujësjellësit – Arsovska: MPB nuk reagon, Shkupi në rrezik

Kryetarja e Qytetit të Shkupit, Danella Arsovska, ka reaguar ndaj krizës aktuale të furnizimit me ujin e e pijshëm në kryeqytet, duke theksuar se konsumi i tepërt dhe lidhjet ilegale po e dëmtojnë rëndë sistemin e furnizimit, njofton Flaka

“Uji është një burim natyror, nuk prodhohet në fabrikë, buron nga natyra. Nuk është çështje e rrjetit apo e gypave, por thjesht burimi natyror i qytetit dhe sistemi plotësues i puseve nuk kanë kapacitet të furnizojnë me ujë të pijshëm aq sa konsumojnë disa nga banorët,” theksoi Arsovska.

Sipas saj, burimi kryesor i Shkupit – Rrashe, në kushte të thatësirës dhe temperaturave të larta, ka kapacitet të zvogëluar, ndërkohë që konsumimi ka arritur shifra rekord.

“Konsumimi ditor këtë muaj ka arritur në 356.000 metra kub në ditë, që do të thotë rreth 700 litra ujë për banor, një sasi joreale që tregon për keqpërdorime të mëdha,” u shpreh ajo.

Arsovska denoncoi hapur edhe fenomenin e lidhjeve të paligjshme në rrjetin e ujësjellësit:

“Çdo ditë kapen rreth 30 lidhje të egra, me të cilat ujiten ara të tëra, mbushen pishina apo furnizohen ndërtime pa leje. Këta nuk paguajnë asnjë denar dhe konsumojnë pa kufi sepse e marrin ujin falas. Ministria e Punëve të Brendshme nuk po ndërhyn,” shtoi kryetarja e Shkupit.

Duke paralajmëruar për pasoja të rënda, Arsovska theksoi se qytetarët e ndershëm po pësojnë:

“Derisa të mos përfundojë njëri nga këta në burg, situata vetëm do të përkeqësohet. Nuk kemi burim tjetër uji, nuk ka si të sigurohet ujë tjetër, prandaj janë të kota ankesat dhe pakënaqësitë.”

Në fund, ajo publikoi një rast të fundit ku një inspektor i dyshuar i MPB-së, me emrin Bujo, u kap në flagrancë duke bërë një lidhje të paligjshme dhe më pas, sipas saj, sulmoi fizikisht këshilltaren e qytetit të Shkupit, Irena Vitina, përpara dhjetë dëshmitarëve dhe kolegëve të tij që nuk ndërhynë. Ngjarja është e dokumentuar me video.

Arsovska kërkon masa urgjente nga institucionet dhe thotë se pa ndëshkime konkrete, kriza e ujit në Shkup do të thellohet më tej. Flaka