BDI ngre alarmin: Spastrime politike po minojnë shëndetin publik

Bashkimi Demokratik për Integrim (BDI) ka shprehur shqetësim të thellë për, siç thuhet në reagimin e saj, “largimet me motive politike dhe etnike” nga Shtëpia e Shëndetit në Shkup.

Sipas partisë, dhjetëra profesionistë shëndetësorë me përvojë shumëvjeçare, të cilët kanë dhënë kontribut të jashtëzakonshëm sidomos gjatë pandemisë, po zëvendësohen nga aktivistë partiakë, shpesh pa kualifikime përkatëse, vetëm për shkak të përkatësisë së tyre politike apo etnike.

“Ky është një akt i pastër diskriminimi, i papranueshëm në një shtet që pretendon të jetë multietnik dhe demokratik”, thuhet në reagimin e BDI-së.

Partia paralajmëron se po ndërtohet një sistem klientelist në sektorin shëndetësor, ku besnikëria partiake zëvendëson profesionalizmin, ndërsa përkatësia etnike po përjashton qytetarë të tërë nga mundësia për të shërbyer publikun.

“Kjo padrejtësi është edhe një rrezik i drejtpërdrejtë për shëndetin e qytetarëve”, thuhet më tej në deklaratë.

BDI kërkon ndërprerje të menjëhershme të procesit të spastrimeve politike dhe etnike, si dhe hetim të pavarur dhe transparent për kriteret e punësimeve dhe shkarkimeve në këtë institucion.

“Shtëpia e Shëndetit nuk është pronë e asnjë partie. Ajo është shtylla e kujdesit shëndetësor për të gjithë qytetarët, pa dallim etnie apo bindje politike. Do të ketë përgjegjësi politike dhe ligjore për këto veprime”, përfundon reagimi. Flaka