Ambasadori Meidani mbledh ambasadorët në Dibër – Duka: Mirënjohje të veçantë Ambasadorit shqiptar

Ambasadori i Republikës së Shqipërisë në Shkup, z. Denion Meidani, organizoi një vizitë të trupit diplomatik në Komunën e Dibrës, në bashkëpunim me autoritetet vendore dhe përfaqësuesit institucionalë të zonës, njofton Flaka

Në vizitë morën pjesë: z. Michalis Rokas, Ambasador i Bashkimit Evropian, z. Florian Qehaja, Ambasador i Republikës së Kosovës, z. Paolo Palminteri, Ambasador i Italisë, z. Gregor Presker, Ambasador i Sllovenisë, z. Zoran Miljanić, Ambasador i Malit të Zi, z. Zhelyazko Radukov, Ambasador i Bullgarisë, si dhe znj. Vilma Dambrauskiene, Ambasadore e Lituanisë.

Pjesë e takimeve ishin edhe deputetët e zonës znj. Arbana Pasholli, (kryetare e Grupit të Miqësisë Shqipëri–Maqedonia e Veriut) dhe z. Musa Xhaferi (kryetar i Komisionit për Marrëdhëniet me Jashtë të Parlamentit), si dhe z. Fuat Spahiu, kryetar i Këshillit Komunal, z. Ylli Mirzo, sekretar i Komunës dhe z. Burim Kaba, drejtor i NPK “Standard”.

”Mirënjohje të veçantë Ambasadorit Sh.T. z. Denion Meidani për angazhimin dhe përkushtimin e tij që Dibra të shndërrohet në një qendër që vizitohet nga shumë ambasadorë, diplomatë dhe miq nga e gjithë bota, duke kontribuar njëkohësisht në zhvillimin kulturor, turistik dhe ekonomik të qytetit tonë. Dibra me të vërtetë e meriton që t’i rikthehet shkëlqimi i dikurshëm dhe të bëhet sërish një shembull i historisë, kulturës, mikpritjes dhe mundësive të reja ekonomike”, tha Hekuran Duka, kryetar i Dibrës.

Diskutimet u fokusuan në sfidat e zhvillimit lokal, promovimin e potencialit kulturor, historik dhe turistik të Dibrës, si dhe forcimin e bashkëpunimit institucional dhe ndërkufitar me mbështetjen e partnerëve evropianë. Flaka