Halil Snopçe godet VLEN-in: “Ligji për kazinotë? Veç një Déjà Vu pa asnjë benefit!”

Pasi eksponentë të VLEN dolën me deklarime se Qeveria ka sjellë ligjin e ri për kazinotë, ka reaguar ashpër ish-partneri i tyre në koalicion, deputeti i Aleancës për Shqiptarët, Halil Snopçe.

Deputeti Snopçe e cilëson si mashtrim ligjin për të cilin VLEN po mburret dhe e krahason me ligjin e shumëkritikuar të Artan Grubit.

“Disa eksponentë të VLENIT qenkan lëvdëru se qeveria sot e paska kalu ligjin për kazinot ku është paraparë distancë ndërmjet tyre prej 500 metrash. Çka u bë me mbylljen e kazinove? VLENI paska reteru dhe fatkeqësisht pas shumë e shumë zotimeve për mbylljen e kazinove, po kthehemi te verzioni i Artan Grubit,” shkruan Snopçe në një reagim në rrjetet sociale.

Sipas tij, ndryshimi i premtuar nga VLEN ka dështuar të realizohet dhe gjithçka është kthyer në pikën zero.

“A më ndihmon dikush për të bërë dallimin në mes këtij ligji për kazinot me të cilin lëvdërohet VLENI dhe verzionit të ligjit të ashtuquajtur ligji i Artan Grubit?”, pyet Snopçe me ironi.

Deputeti shton se qytetarët janë tradhtuar dhe se fati i njerëzve të prekur nga industria e kazinove mbetet i njëjtë.

“Fatkeqësisht, asgjë e re. Veç një Déjà Vu pa asnjë benefit. Katandisja me fatin e njerëzve me kazinot do të vazhdojë,” shkruan ai.

Snopçe e përmbyll reagimin me një akuzë të drejtpërdrejtë ndaj ish-partnerëve të tij politikë:

“Asgjë nga premtimi, e asgjë nga ndryshimi.”

Reagimi i tij pritet të ndezë debatet politike në skenën shqiptare në Maqedoninë e Veriut, veçanërisht rreth sinqeritetit të premtimeve të VLEN dhe efektivitetit të ligjit të ri për lojërat e fatit. Flaka