Përplasja Ademi – Iseni: A fshihet përfaqësimi i shqiptarëve në polici?

Deputeti i BDI-së dhe nënkryetari i saj, Arbër Ademi, ka ngritur alarmin për një zhvillim që ai e cilëson si ndër më të rrezikshmit për të drejtat e shqiptarëve që nga nënshkrimi i Marrëveshjes së Ohrit. Në një reagim publik, Ademi ka denoncuar propozimin për fshirjen e nenit 96 nga Ligji për Policinë, një nen që garanton përfaqësimin e drejtë dhe adekuat të komuniteteve në institucionet e sigurisë.

“Sot jemi dëshmitarë të një tjetër goditjeje të rëndë: VMRO-DPMNE, në bashkëpunim me ‘Vlen’, ka propozuar fshirjen e nenit 96 nga Ligji për Policinë. Dhe kjo po ndodh në heshtje, me dorën e atyre që thonë se ‘kujdesen për shqiptarët’…”, deklaroi Ademi.

Neni 96 është një nga instrumentet juridike që buron nga Marrëveshja e Ohrit dhe që garanton përfaqësim proporcional dhe barazi gjinore në punësimin në polici, një institucion ku komuniteti shqiptar tradicionalisht ka qenë i nënpërfaqësuar.

Përplasja me zëvendësministrin Iseni

Në reagim ndaj deklaratës së Ademit, zëvendësministri i Punëve të Brendshme, Astrit Iseni, nga rradhët e “Vlen”, e cilësoi akuzën si “dezinformatë të turpshme”, duke pretenduar se nuk është fshirë asgjë, por se dispozitat e përfaqësimit janë të përfshira në një ligj më të gjerë – atë për Ministrinë e Punëve të Brendshme.

“Asnjë parim i përfaqësimit të drejtë dhe adekuat nuk është fshirë, përkundrazi, është përforcuar në Ligjin për Ministrinë e Punëve të Brendshme”, deklaroi Iseni, duke shtuar se neni 8 i këtij ligji garanton të njëjtat standarde.

Sipas Isenit, bëhet fjalë për harmonizim teknik që shmang përsëritjen e normave në dy ligje të ndryshme.

Ademi: Faktet janë të qarta – neni 96 po fshihet me dorën e shqiptarëve

Por Arbër Ademi nuk u tërhoq. Në një reagim të dytë të ashpër, ai e quajti justifikimin e VLEN-it si mbulim të bashkëpunimit të hapur me VMRO-në për të zhbërë arritjet e Marrëveshjes së Ohrit.

“Që VLEN-i është thjesht dekor në këtë qeverisje, tashmë të gjithë e dimë, ndaj nuk më bëjnë përshtypje arsyetimet e tyre në favor të çdo gjëje që bën VMRO,” tha Ademi.

Ai publikoi dokumente zyrtare dhe fotografi nga propozim-ligji, ku sipas tij, është e qartë se neni 96 është hequr krejtësisht, pa garanci juridike të njëjtë brenda ligjit specifik për Policinë.

“Në fotografitë që kam publikuar e keni të zezën mbi të bardhë: çfarë thotë neni 96 dhe si propozohet fshirja e tij. Ky është një precedent i rrezikshëm që prek vetë arkitekturën kushtetuese të përfaqësimit”, paralajmëroi ai.

A po shpërbëhet Marrëveshja e Ohrit?

Ademi paralajmëroi se veprime të tilla janë pjesë e një procesi sistematik të zhbërjes së Marrëveshjes së Ohrit, marrëveshje kjo që është garantuar ndërkombëtarisht dhe që përbën bazën e barazisë dhe stabilitetit ndëretnik në vend.

“Skandalet nuk kanë fund! Marrëveshja e Ohrit po shpërbëhet hap pas hapi, ndërsa disa heshtin për interesa politike afatshkurtra,” tha ai, duke e konsideruar heshtjen e partnerëve shqiptarë në qeveri si bashkëfajësi.

Apel për mobilizim dhe reagim institucional

Ademi kërkoi nga institucionet vendore dhe ndërkombëtare, përfshirë delegacionin e BE-së dhe misionet diplomatike, që të ndjekin nga afër këtë zhvillim dhe të mos lejojnë që të cenohet barazia ndëretnike, një nga vlerat bazë të shtetit multietnik.

“Nëse ky nen fshihet, çdo garanci për përfaqësimin e shqiptarëve në polici mbetet në dorë të vullnetit politik të shumicës, gjë që është e papranueshme. Garancitë për të drejtat nuk ndërtohen mbi besim, por mbi ligj”, përfundoi Ademi.

Në fund, mbetet pyetja themelore: A po zhbëhet Marrëveshja e Ohrit nën heshtjen e partnerëve shqiptarë të qeverisë? Dhe a do të lejohet që nenet që mbrojnë barazinë të fshihen, pikërisht nga ata që kanë premtuar përfaqësim dhe dinjitet? Flaka