Mexhiti dhe Ganiu inspektojnë investimin në Sahat Kullë – mungojnë përfaqësuesit e tjerë të VLEN-it

Sot në Çair u zhvillua një vizitë inspektuese në lagjen Sahat Kullë, ku po realizohet një nga projektet më të rëndësishme infrastrukturore në komunë, me një vlerë prej 59.861.572 denarësh (afro 1 milion euro). Në terren ishin Kryetari i Komunës së Çairit, z. Visar Ganiu, dhe Zëvendëskryeministri i Parë, z. Izet Mexhiti, të cilët u njohën nga afër me ecurinë e punimeve.

“Ky është një projekt që do të përmirësojë ndjeshëm jetën e qytetarëve në këtë zonë me rëndësi të madhe historike dhe funksionale për Çairin. Po rikonstruktojmë ujësjellësin dhe rrjetin e kanalizimit në dhjetë rrugë, përfshirë rrugë shumë të frekuentuara, si ajo pas Poliklinikës së Bit Pazarit dhe Çairska,” deklaroi kryetari Visar Ganiu, duke shtuar se punimet po ecin sipas planit dhe me standarde të larta.

Projekti është financuar përmes thirrjes publike të Ministrisë së Pushtetit Lokal për vitin 2024 dhe përfshin rikonstruksionin e rrjeteve të ujësjellësit dhe kanalizimit fekal dhe atmosferik në këto rrugë të Sahat Kullës: pas Poliklinikës së Bit Pazarit, Çairska, 178, 156, 374, 177 (pjesa e parealizuar), 150, 397, 157 dhe Hristijan Todorovski Karposh.

“Me këtë investim, i japim zgjidhje një problemi të kahershëm dhe rrisim standardin e jetesës për mbi 260 familje dhe institucione kyçe, si Shkolla Fillore ‘Kongresi i Manastirit’, selia e BFI-së, dhe dy xhami të rëndësishme: Isa Beu dhe Sulltan Murati,” theksoi Izet Mexhiti.

Të dy përfaqësuesit e Aleancës për Shqiptarët vlerësuan rëndësinë strategjike të Sahat Kullës dhe nevojën për vazhdimësi në investime serioze infrastrukturore, ndërsa vunë në dukje se investime të tilla nuk janë luks, por nevojë për një jetesë dinjitoze.

Megjithatë, vëmendje të veçantë mori mungesa e përfaqësuesve të partive të tjera nga koalicioni VLEN, konkretisht Alternativa dhe Lëvizja Besa, të cilët nuk ishin të pranishëm në këtë ngjarje. Flaka