Fetai: Me VLEN merr fund padrejtësia ndaj shqiptarëve në administratë

Koalicioni VLEN ka shpallur një vendim historik për barazinë dhe dinjitetin e shqiptarëve në administratën publike të Maqedonisë së Veriut. Në një konferencë për media, zëdhënësi i VLEN-it, Arben Fetai, njoftoi se nga 1 janari 2026 do të eliminohen titujt diskriminues si “bashkëpunëtor i ri” dhe “referent i ri”, të cilët, sipas tij, për dy dekada kanë shërbyer si mjet për të mbajtur shqiptarët të nëpërkëmbur në institucione.

“BDI-ja për dy dekada ka ndërtuar një model qeverisës që ka një tipar të vetëm dallues: improvizimet dhe zgjidhjet kozmetike. Asnjëherë nuk e ka çuar asnjë proces deri në fund,” deklaroi Fetai.

Duke marrë si shembull të mungesës së vullnetit politik rrugën Shkup–Bllacë dhe dështimin për miratimin e ligjit për përfaqësim të drejtë, Fetai theksoi se shqiptarët janë trajtuar si qytetarë të dorës së dytë.

“Për 22 vite të qeverisjes së BDI-së, shqiptarët në institucione u getoizuan dhe u poshtruan, duke ngelur pafundësisht në kategorinë ‘bashkëpunëtor i ri’. Ky titull nuk ishte vetëm gradë profesionale. ‘Bashkëpunëtor i ri’ ishte etiketë e padrejtësisë,” tha ai.

Ai shtoi se ky diskriminim nuk do të vazhdojë më nën qeverisjen e VLEN.

“Me VLEN, nuk ka më ‘bashkëpunëtor të ri’! Nuk ka më ‘referent të ri’! Duke filluar nga 1 janari 2026, të gjithë të punësuarit me titullin ‘bashkëpunëtor i ri’ do të avancohen automatikisht në gradën ‘bashkëpunëtor’. Të punësuarit me titullin ‘bashkëpunëtor’ do të bëhen ‘bashkëpunëtor profesional’. Ata me arsim të mesëm që mbajnë titullin ‘referent i ri’ ose ‘referent’ do të avancohen në gradën ‘referent i lartë’, e ky i fundit do të zëvendësohet me ‘referent i pavarur’,” sqaroi Fetai.

Vendimi do të zbatohet automatikisht, me fuqinë e ligjit, pa pasur nevojë për aplikime individuale ose procedura burokratike shtesë.

“Ky është dallimi mes nesh dhe atyre që sunduan shqiptarët për 22 vjet. BDI kishte gjithë kohën ta bënte këtë gjë. Por nuk deshi apo nuk mundi. VLEN e bëri brenda vitit të parë të qeverisjes!”

Sipas tij, ky vendim nuk është vetëm reformë teknike, por një akt me peshë historike dhe morale:

“Kjo nuk është vetëm drejtësi administrative. Është korrigjim i një padrejtësie historike. Është politikë me integritet. Sepse për ne, barazia nuk është slogan fushate, por thelbi i pushtetit.”

Në fund, Fetai theksoi se VLEN synon fuqizimin e shqiptarëve në institucione dhe kthimin e dinjitetit të mohuar për dekada.

“Pushteti për ne nuk është për të sunduar, nënshtruar apo kushtëzuar. Pushteti për ne përdoret për të çliruar potencialin e shqiptarëve, për t’ua kthyer shqiptarëve dinjitetin e cunguar!”