Ahmeti kujton Demaçin: “Zëri i ndërgjegjes kombëtare, vepruam krah për krah për të njëjtin ideal”

Në përvjetorin e shtatë të ndarjes nga jeta të Adem Demaçit, lideri i Bashkimit Demokratik për Integrim, Ali Ahmeti, ka përkujtuar veprimtarin e njohur të çështjes kombëtare përmes një fotografie të rrallë të publikuar në rrjetet sociale, ku shihet së bashku me “Bacën Adem”.

“7 vite pa Bacën Adem Demaçi. Sot përkujtojmë Bacën Adem, njeriun që u bë simbol i qëndresës, zëri i ndërgjegjes kombëtare dhe shembulli i pastër i sakrificës për liri,” shkruan Ahmeti në postim.

Lideri i BDI-së thekson rëndësinë e rrugëtimit dhe qëndresës së Demaçit si frymëzim për brezat që kërkuan lirinë dhe dinjitetin kombëtar.

“Rruga e tij e mundimshme, por e drejtë, i dha kuptim qëndresës sonë dhe frymëzoi breza të tërë në kërkim të lirisë, drejtësisë dhe dinjitetit kombëtar,” thotë Ahmeti.

Ai shton se ka qenë dëshmitar dhe bashkëveprimtar në kohët vendimtare të historisë kombëtare, duke e cilësuar këtë si një nder të veçantë.

“Kam nderin dhe krenarinë që në kohët më të vështira e më të lavdishme të historisë sonë, pata mundësinë të veproj krah për krah me Bacën Adem, për të njëjtin ideal.”

Ahmeti përfundon postimin me një mesazh nderimi dhe përjetësimi të figurës së Demaçit:

“Emri dhe vepra e tij do të jetojnë përgjithmonë në kujtesën e popullit tonë. Lavdi e përjetshme Bacës Adem Demaçi!” Flaka