Ky ishte motori që shkaktoi aksidentin vdekjeprurës të Agonit – Gostivari në zi!

Një aksident tragjik ka tronditur qytetin e Gostivarit në orët e para të mëngjesit të së martës, ku humbi jetën një i ri 17-vjeçar në një përplasje mes një veture dhe një motoçiklete, njofton redaksia Flaka.

Ngjarja ndodhi në hyrje të qytetit, në bulevardin kryesor, një zonë me qarkullim të dendur, ku përplasja mes dy automjeteve ka rezultuar fatale për drejtuesin e motoçikletës. Sipas burimeve jozyrtare, viktima është Agon Baka, i lindur më 17 maj 2007, i cili ndërroi jetë në vendngjarje si pasojë e plagëve të rënda të pësuara.

“Ekipi i autoambulancës që mbërriti në vendngjarje vetëm konstatoi vdekjen,” bëjnë me dije burime për Flaka.

Në terren ndërhynë menjëherë ekipet e policisë, ndihma e shpejtë dhe prokurori kujdestar nga Prokuroria Themelore Publike e Gostivarit. Për shkak të ekspertizës së detajuar, pjesa e rrugës ku ndodhi aksidenti u bllokua për disa orë, duke shkaktuar vështirësi në qarkullim.

Ende nuk janë bërë publike të dhëna zyrtare nga SPB Tetovë, por hetimet janë duke vazhduar për të përcaktuar saktë shkaqet e aksidentit.

Redaksia Flaka sjell për herë të parë fotografi të motoçikletës që drejtonte i riu në momentin fatal – një motor sportiv i llojit “cross”, që dyshohet të ketë qenë i papërshtatshëm për përdorim në zonat urbane pa masat e duhura të sigurisë.

Me këtë rast, redaksia Flaka shpreh ngushëllimet më të sinqerta për familjen Baka, duke ndarë dhimbjen me të afërmit dhe miqtë e të ndjerit Agon, i cili ishte në lulëzimin e jetës dhe me ëndrra që fatkeqësisht u shuan tragjikisht në rrugët e qytetit.