Debati për vetingun ndez skenën politike: BDI kërkon hetim gjithëpërfshirës, VLEN akuzon për hipokrizi

Debati për vetingun ka rikthyer tensionet mes Bashkimit Demokratik për Integrim (BDI) dhe opozitës shqiptare të grupuar në koalicionin VLEN. Qëndrimet e kundërta janë shoqëruar me akuza të ndërsjella për hipokrizi politike, korrupsion dhe manipulim të opinionit publik.

BDI: “Veting për të gjithë, pa dallim partie apo pozite”

Nga BDI, përmes zëdhënësit Fitim Mustafi, është artikuluar qartë kërkesa për një veting gjithëpërfshirës, që sipas tyre do të garantonte pastërti në sistemin gjyqësor, administratën publike dhe politikën.

“Kush ka frikë nga vetingu, ka diçka për të fshehur. Ne jemi për një proces transparent dhe të mbështetur nga faktori ndërkombëtar. Vetëm në këtë mënyrë mund të garantojmë drejtësi dhe barazi për të gjithë qytetarët,” – deklaroi Mustafi në një konferencë për shtyp në Tetovë.

Sipas BDI-së, vetingu nuk duhet të shërbejë si instrument selektiv politik, por si mekanizëm për pastrimin e institucioneve nga të gjithë ata që kanë keqpërdorur pozitën apo kanë përfituar pasuri në mënyrë të paligjshme.

VLEN: “Nuk e kaloni as kontrollin më të thjeshtë – Filloni me liderët tuaj”

Koalicioni opozitar VLEN, ndërkaq, e cilëson retorikën e BDI-së për vetingun si manipulim politik dhe përpjekje për të shpëtuar nga llogaridhënia për pasurinë e akumuluar gjatë dy dekadave në pushtet.

“Vetingun e duam të parët ne, por ai duhet të fillojë nga Ali Ahmeti, Artan Grubi dhe çdo funksionar që ka qenë në pushtet mbi 20 vjet. Ata që kanë ndërtuar vila dhe pasuri marramendëse nuk mund të flasin për drejtësi,” – u shpreh zëdhënësi i VLEN-it, Arben Taravari.

VLEN thekson se është për një proces real të verifikimit të pasurive dhe burimeve financiare të politikanëve, por jo për, siç e quajnë ata, “shfaqje publike që i shërbejnë mbulimit të dështimeve qeveritare.”

“Populli e ka kuptuar lojën: kur BDI është në hall, nxjerr fjalën ‘veting’. Por realiteti është që të gjithë frikën e kanë nga një prokurori e pavarur dhe një gjyqësor që nuk kontrollohet nga BDI-ja dhe miqtë e saj,” – shtoi Taravari.

Kërkesat dhe dilemat

Të dyja palët, të paktën në retorikë, janë pro vetingut. Por ndryshe nga BDI që propozon një model të mbështetur nga ndërkombëtarët dhe institucione të brendshme, VLEN kërkon fillimisht hetim të pasurisë së funksionarëve aktualë dhe ish-zyrtarëve të BDI-së.

Nëse do të realizohet një proces real vetingu në Maqedoninë e Veriut, mbetet për t’u parë. Por një gjë është e qartë: çështja po kthehet në armë politike, e përdorur në funksion të zgjedhjeve të ardhshme dhe përpjekjes për të fituar besimin e qytetarëve të zhgënjyer.