Taravari shpalos Pikën 7 të Platformës Kombëtare – bujqësia në qendër

Kryetari i Aleancës për Shqiptarët, Arben Taravari, në një deklaratë për media nga Shkupi, ka shpalosur Pikën 7 të Platformës Kombëtare, që lidhet me bujqësinë. Ai e quajti bujqësinë jo vetëm sektor ekonomik, por edhe trashëgimi dhe garanci për sigurinë ushqimore të shqiptarëve.

“Bujqësia shqiptare, përveç se është një sektor ekonomik, ajo është edhe një trashëgimi, një mënyrë jetese dhe një garanci për sigurinë ushqimore të popullit tonë. Për Aleancën për Shqiptarët, forcimi i bujqësisë është një prioritet kombëtar dhe lokal, sepse aty nis zhvillimi ekonomik, mirëqenia e familjeve dhe ruajtja e tokës si pasuri e shenjtë kombëtare,” deklaroi Taravari.

Angazhime konkrete

Taravari theksoi disa masa që Aleanca për Shqiptarët synon të zbatojë në këtë sektor:

• “Subvencione të posaçme dhe ndihmë direkte për bujqit shqiptarë, me përparësi për ata që sot mbeten jashtë çdo mbështetjeje shtetërore.”
• “Krijimin e tregjeve komunale dhe kooperativave bujqësore, për të ulur shpenzimet, rritur prodhimin dhe siguruar shitjen direkte të prodhimeve vendore.”
• “Investime serioze në infrastrukturën rurale, duke përfshirë sisteme moderne të ujitjes, rrugë të asfaltuara fshatare dhe ndriçim publik në zonat rurale.”
• “Zhvillimin e bujqësisë ekologjike dhe agroturizmit si motorë të rinj të ekonomisë rurale dhe si mënyrë për të promovuar trashëgiminë natyrore e kulturore shqiptare.”
• “Krijimin e qendrave të këshillimit bujqësor dhe veterinar, me ekspertë të terrenit, shërbime teknike dhe vizita të rregullta për shëndetin e bagëtive.”
• “Mbrojtjen e tokave bujqësore nga betonizimi dhe nga çdo shfrytëzim i pakontrolluar, duke e trajtuar tokën pjellore si pasuri të përbashkët kombëtare që duhet ruajtur me ligj.”

Mesazhi politik

Taravari e përmbylli deklaratën duke nënvizuar rëndësinë e bujqit shqiptar në identitetin dhe të ardhmen e vendit.

“Ne besojmë se bujku shqiptar është kujdestari i tokës, ushqimit dhe traditës sonë. Forcimi i tij është forcimi i gjithë kombit. Çdo investim në bujqësi është investim në të ardhmen tonë të përbashkët,” u shpreh ai. Flaka Media