ASH: VLEN dështoi me Kushtetutën e re – Bllokadë në rrugën drejt BE-së

Subjektet politike të koalicionit VLEN, para zgjedhjeve parlamentare të vitit 2024, u zotuan se do të respektojnë ligjin dhe kushtetutshmërinë në Maqedoninë e Veriut, por njëkohësisht shpallën se kushtetuta aktuale është e mangët, e kufizuar dhe nuk i pasqyron realitetet politike, sociale e etnike të vendit.

“VLEN premtoi se brenda gjashtë muajve të parë të qeverisjes do të nisin ndryshimet kushtetuese, për të ndërtuar një dokument të ri, më demokratik dhe modern, që do ta ridefinonte vendin si shtet të barabartë të dy bashkësive shumicë, me të drejta të garantuara për të gjitha komunitetet tjera, sipas praktikave më të mira të Bashkimit Evropian”, thuhet në reagimin e Aleancës për Shqiptarët.

Sipas ASH-së, ky ishte premtimi madhor me të cilin VLEN e justifikoi pjesëmarrjen në qeveri, duke e paraqitur atë si hapin vendimtar për integrimin e vendit në BE.

“Pas gati një vit e gjysmë qeverisje, çfarë ndodhi? Asgjë. Ndryshimet kushtetuese nuk ndodhën. Deri më sot, procesi ka mbetur vetëm fjalë, ndërsa rruga e vendit drejt BE-së është bllokuar edhe më shumë”, akuzon Aleanca për Shqiptarët.

ASH thekson se koha ka dëshmuar drejtësinë e vendimit të saj për t’u larguar nga koalicioni qeveritar.
“Çdo ditë po dëshmohet se Aleanca për Shqiptarët kishte të drejtë kur mori vendimin për të braktisur këtë qeveri, e cila u tregua antishqiptare, antievropiane dhe antiamerikane”, përfundon reagimi. Flaka Media