Flaka: Presioni ndaj gazetarëve është i papranueshëm – kërkojmë hetim dhe përgjegjësi

Agjencia e Lajmeve Flaka reagon ashpër ndaj pohimeve të gazetarit të Tetova Sot, Nevrij Ademi, i cili ka denoncuar presion nga organet e rendit në Tetovë. Sipas tij, në polici ishte dhënë urdhër që t’i konfiskohen mjetet e punës, përfshirë telefonët personalë, pa një vendim nga organet kompetente të hetuesisë.

“Pohimet e gazetarit të Media Online Tetova Sot, z. Nevrij Ademi, për presion nga ana e organeve të rendit, janë të papranueshme. Pa një vendim të Prokurorisë, Policia nuk ka kompetenca të kërkojë konfiskimin e mjeteve të punës të gazetarëve,” thuhet në reagimin e Flaka-s.

Agjencia thekson se kjo tentativë për konfiskim është një akt i paprecedent që përbën formë presioni ndaj mediave dhe lirisë së fjalës.

“Ne dënojmë këtë tentativë si një lloj presioni ndaj medieve dhe fjalës së lirë. Kërkojmë që të kryhen hetime rreth rastit, të mbahet përgjegjësi ndaj personave jokompetent që japin urdhra të tillë joligjorë në SPB-Tetovë, dhe rasti të zbardhet plotësisht,” theksohet më tej.

Në reagim, Flaka rikujton edhe kritikat e fundit të Raportit të Departamentit të Shtetit për të Drejtat e Njeriut për vitin 2024.

“Është e papranueshme që institucionet shtetërore të vazhdojnë me këtë qasje, pa kaluar as një javë nga publikimi i raportit ku ndër vërejtjet kyçe ndaj Maqedonisë së Veriut ishte edhe liria e medias. Raporti theksonte dhunën dhe kërcënimet ndaj gazetarëve, duke i paraqitur si problem serioz,” thuhet në reagim.

Agjencia Flaka fton Shoqatën e Gazetarëve – SHGM dhe institucionet e tjera që merren me median dhe lirinë e shprehjes të reagojnë ndaj këtij rasti dhe të kërkojnë ndaljen e menjëhershme të presioneve ndaj gazetarëve. Flaka Media