Fjala e lirë, reagime të shumta – Nga ambasadori Meidani deri te gazetarët dhe politikanët vendorë

Liria e medias po vihet në pikëpyetje pas thirrjes dy-orëshe në polici të gazetarit të portalit TetovaSot, Nevrij Ademi, ku sipas tij, është tentuar edhe konfiskimi i pajisjeve elektronike pa vendim prokurorie. Rasti ka nxitur reagime të shumta nga politikanë, gazetarë dhe përfaqësues të shoqërisë civile, shkruan Flaka Media

Ambasadori Denion Meidani u shpreh: “Kur media është e lirë, çdo e drejtë tjetër është më e siguruar. Mbrojtja e fjalës së lirë është mbrojtje e vetë demokracisë dhe e dinjitetit qytetar.”

Nënkryetari i BDI-së , Bujar Osmani tha: “Dënoj çdo përpjekje për t’u penguar puna dhe pavarësia e mediave. Në vend se të ushtrojmë presion ndaj tyre, duhet t’i mbrojmë.”

Gazeta Koha reagoi duke theksuar: “Është i tmerrshëm guximi i policisë së Tetovës që vepron me urdhërat e dajallarëve të liderëve.”

Nga ana tjetër, kryeredaktori i TetovaSot, Urim Saliu, tha: “Gazetarët nuk janë armiq të shtetit, por sy dhe veshë të opinionit publik. Heshtja përballë këtyre rasteve do të thotë pranim i frikësimit.”

Blerant Ramadani deklaroi: “Çdo tentativë për presion ndaj mediave duhet trajtuar me seriozitet. Mbështetje për çdo zë që lufton për të vërtetën.”

Edhe funksionari i LD-së, Muhamet Ameti, u shpreh: “Mos i ngucni ata që e flasin të vërtetën, s’keni me ia dalë.”

Deputetja Rina Hajdai theksoi: “Ende diskutohet liria e mediave?! Nuk ka demokraci pa respektimin e fjalës së lirë.”

Gazetari Xhelal Neziri e quajti rastin “skandaloz keqpërdorimin e institucioneve për qëllime partiake dhe përdorimin e policisë për frikësim”.

Deputeti Blerim Bexheti shprehet që kush mundohet të ndalë fjalën e lirë të mediumeve, po tregon diktaturën e mendjes dhe frikën nga transparenca. “Përkrahje deri në fund për të gjitha mediumet, ndërsa në këtë ditë jemi të gjithë me Tetovasot”, shkruan Bexheti.

Kryeredaktori i Flaka, Driton Zenku, shtoi: “Sot është Nevrij Ademi. Nesër mund të jetë kushdo prej nesh. Ky nuk është rast i izoluar, por një model presioni e kërcënimi.”

Edhe redaksia Flaka reagoi ashpër: “Pa një vendim të Prokurorisë, Policia nuk ka kompetenca të kërkojë konfiskimin e mjeteve të punës. Kërkojmë hetim dhe përgjegjësi ndaj personave jokompetent.”

Ndërkohë, analisti Medai Shaholli u shpreh: “Presionet dhe shantazhet për ta mbytur fjalën e lirë janë përpjekje qyqare të vasalit Kasami. Fjalën e lirë nuk e burgosni dot, ajo do të jetojë.”

Këshilltarja e Lëvizjes BESA, Besa Kadriu shprehet që çdo tentim për të frikësuar është një sulm i drejtpërdrejtë ndaj informimit.

Për gazetaren Nora Kaliqi liria e shprehjes është e drejtë e garantuar me Konventën Ndërkombëtare dhe me Kushtetutën e Republikës së Maqedonisë së Veriut. Ekzistojnë mekanizma të ndryshëm ligjorë, si dhe struktura profesionale e organizata esnafe gazetareske, që mund të përdoren për adresimin e shkeljeve etike dhe profesionale.

Edhe portali Top24 shpreh shqetësimin për ngjarjet e fundit mbi presionin dhe kërcënimin mbi fjalën e lirë nga ana e pushtetit. 

Ky rast ka rihapur debatin për respektimin e lirisë së shprehjes në vend, ndërkohë që Raporti i fundit i Departamentit Amerikan të Shtetit kritikonte Maqedoninë e Veriut pikërisht për kërcënime ndaj gazetarëve dhe presione ndaj mediave. Flaka Media