Taravari: Aleanca për Shqiptarët – faktori përcaktues i zgjedhjeve

Kryetari i ASH-së, Arben Taravari në intervistën për Tv Arbëria i u shpreh i bindur se Aleanca për Shqiptarët mbetet faktor vendimtar në përcaktimin e fituesve në skenën politike. Sipas tij, rezultatet zgjedhore të bllokut shqiptar do të ishin shumë më të dobëta pa Aleancën.

“Mos të ishte Aleanca për Shqiptarët, VLEN do të kishte maksimum shtatë deputetë. Me Aleancën bashkë, arritën katërmbëdhjetë. Sot jam i sigurt se aty ku shkon Aleanca, aty është edhe fitorja. Praktikisht, Aleanca përcakton kush fiton zgjedhjet.”, tha mes të tjerash lideri i ASH-së, Arben Taravari, transmeton Flaka Media

Disbalanca politike – Taravari: Nga 30 deputetë shqiptarë në Kuvend, vetëm 11 janë pjesë e pushtetit

Kryetari i ASH-së, Arben Taravari në intervistën për Tv Arbëria deklaroi që shpërndarja aktuale e pushtetit mes deputetëve shqiptarë dhe maqedonas bie ndesh me frymën e Marrëveshjes së Ohrit. Ai theksoi se shumica shqiptare në opozitë përfaqëson një padrejtësi të dukshme politike.

“Nga 30 deputetë shqiptarë në Kuvend, vetëm 11 janë pjesë e pushtetit, ndërsa 19 janë në opozitë. Kjo bie ndesh me frymën e Marrëveshjes së Ohrit dhe me parimin e fair play politik, ku edhe shumica e deputetëve shqiptarë, edhe shumica e deputetëve maqedonas duhet të jenë në pushtet.”, tha mes të tjerash Taravari.

Dorëheqja e Aleancës nga Qeveria – Taravari: Precedent i ri politik pas 35 vitesh

Kryetari i ASH-së, Arben Taravari në intervistën për Tv Arbëria kujtoi vendimin për dorëheqje nga Qeveria si një hap të guximshëm që krijoi precedent të ri në historinë politike të vendit. Sipas tij, ky akt tregoi një përgjegjësi të re politike që deri më tani nuk kishte ndodhur, transmeton Flaka Media

“S’ka ndodhur në Maqedoni për 35 vite që një parti politike apo një ministër të dorëhiqet vetë. Largimi ynë nga Qeveria solli një gjendje të jashtëzakonshme që zgjati një ose dy muaj dhe nxori në pah disbalancën mes përfaqësimit shqiptar dhe maqedonas në pushtet.”, nënvizoi Taravari.

Taravari: Mickoski përdoruri me zgjuarsi fragmentimin e koalicionit VLEN për të krijuar avantazh politik

Gjatë intervistës për Tv Arbëria, lideri i Aleancës për Shqiptarët, Arben Taravari u shpreh se kryeministri maqedonas, Hristijan Mickoski, ka përdorur me zgjuarsi fragmentimin e koalicionit VLEN për të krijuar avantazh politik. Ai tha se qasja e Mickoskit ishte e bazuar në raportet individuale me liderët shqiptarë, duke dobësuar kështu pozicionin e përbashkët.

“Mickoski është super inteligjent dhe e pa se ne ishim si një orkestër e desinkronizuar. Ai e shfrytëzoi atë rast duke komunikuar veçmas me secilin lider dhe duke mbajtur raporte miqësore. Kjo e dobësoi fuqinë e bllokut shqiptar në tërësi.”, deklaroi Taravari, transmeton Flaka Media