Tetovë – BDI kundër prishjes së Shkollës Tekstile: “Arsimi nuk është fushë për eksperimente”

Dega e BDI-së në Tetovë ka reaguar sot ndaj vendimit për prishjen e ndërtesës së Shkollës së Mesme Teknike (“Shkolla Tekstile”), duke e cilësuar si një nga “eksperimentet më të rrezikshme” që po kryhen mbi arsimin në qytet.

Sipas BDI-së, që nga ardhja e Bilall Kasamit në krye të komunës, kjo shkollë ka degraduar si në infrastrukturë ashtu edhe në cilësi, duke humbur interesin e nxënësve dhe duke pësuar rënie të vazhdueshme. “Sot, në vend se të gjendet zgjidhje për zhvillim dhe përmirësim, kemi vendimin absurd për shkatërrimin e godinës, duke futur prindërit dhe nxënësit në pasiguri totale”, theksojnë nga dega lokale.

Ata kritikon vendimin për zhvendosjen e nxënësve në hapësirat e shkollës fillore “Besa”, duke e konsideruar këtë “të papranueshme dhe kundër çdo standardi pedagogjik”. BDI akuzon qeverisjen lokale për mungesë transparence, planifikimi dhe përgjegjësie, duke përmendur si shembull edhe projektin e tribunës së stadiumit, që sipas tyre “u mbajt vetëm në letër”.

“Projektet e komunës me 3D deri më sot e dijmë se si kanë përfunduar. Të gjitha kanë ngelur vetëm në letër. Arsimi nuk është fushë për eksperimente. Arsimi është garanci për të ardhmen e qytetit”, theksojnë nga BDI.

Dega e BDI-së apelon tek qytetarët, prindërit, nxënësit dhe mësimdhënësit që të kërkojnë ndryshim, duke theksuar se nga tetori Tetova do të ketë një kryetar që “e kupton vlerën e arsimit, Bajram Rexhepin, i cili do ta kthejë arsimin profesional në prioritet dhe do t’u japë fund lojërave me të ardhmen e fëmijëve tanë”. Flaka Media