VLEN: Nis mbyllja e deponisë në Nikushtak

VLEN ka njoftuar sot nisjen e një “aksioni historik” për mbylljen dhe sanimin e deponisë në Nikushtak të Likovës, të cilën e cilëson si një nga pikat më të rrezikshme mjedisore në vend, që për dekada helmoi ajrin, tokën dhe ujin e mijëra qytetarëve.

“Kjo deponi, e identifikuar në Planin Kombëtar si një nga pikat më kritike për shëndetin publik dhe mjedisin, për 24 vite u la në harresë nga BDI-ja. Premtime pafund, zero zgjidhje! Banorët e Likovës, Nikushtakut, Haraçinës, Grushinës e Orllancës përjetuan vetëm tym, helm dhe rrezik për jetën”, thuhet në reagimin e VLEN.

Sipas tyre, ndryshimi ka ardhur me qeverinë e re: “Qeveria e dalë nga vullneti i qytetarëve, përmes Ministrisë së Ambientit Jetësor dhe Planifikimit Hapësinor, ka siguruar 5 milionë denarë nga Buxheti i vitit 2025, si dhe pajisjet mekanike të nevojshme për ta mbyllur përgjithmonë këtë deponi të egër. Projekti tashmë ka elaboratin gjeodetik të përgatitur, ndërsa punimet kanë filluar konkretisht.”

VLEN thekson se ky është dëshmi e qartë se ndryshimi nuk është fjalë, por vepër: “Në vetëm një vit, kemi bërë atë që BDI nuk e bëri në dy dekada. Me këtë aksion, ne po e kthejmë dinjitetin e banorëve të Likovës dhe gjithë rajonit. Po i japim fund një makthi shumëvjeçar dhe po dëshmojmë se ndryshimi është real, i prekshëm dhe i pakthyeshëm.”

Në përmbyllje, VLEN e paraqet këtë si fitore të dyfishtë: “VLEN është garanca se kjo nuk është vetëm një fitore për mjedisin, por edhe për shëndetin, sigurinë dhe jetën e qytetarëve tanë. VLEN për një Likovë pa mbeturina, për një mjedis të pastër, për një jetë me dinjitet!” Flaka Media