VLEN: Shqiptarët e ndëshkuan BDI-në, Taravari simbol i tradhtisë politike

Lëvizja VLEN ka sulmuar sot ashpër Arben Taravarit, duke e quajtur “turpin më të madh politik të shqiptarëve në Maqedoni”.

“Nga njeriu që dikur fliste për ‘ndryshim’, ai u shndërrua në shërbëtor të Ali Ahmetit dhe Artan Grubit, duke u kthyer në patericë të BDI-së ‘non grata’, partisë më të korruptuar dhe më të urryer nga shqiptarët,” – thekson VLEN.

Sipas kësaj lëvizjeje, Taravari nuk veproi për parime apo interes të qytetarëve, por për përfitime personale, duke përmendur investimin “Gjoka” dhe marrëveshjet e tij të errëta si dëshmi të këtij sjelljeje.

“Sot, Taravari është bashkëpunëtor i ngushtë i BDI-së së kriminalizuar, që për dy dekada e ka mbajtur peng zhvillimin e shqiptarëve,” – shton VLEN.

VLEN nënvizon se shqiptarët nuk kanë harruar kush ka sjellë varfërinë, padrejtësinë dhe izolimin, dhe akuzon Taravarit se ka shitur kauzat e shqiptarëve për interesa personale.

“Ne nuk do të lejojmë që lojërat e tij të shpëtojnë BDI-në nga rrënimi politik. Shqiptarët kanë zgjedhur ndryshimin dhe ky ndryshim është i pandalshëm,” – thekson VLEN.

Lëvizja e prezanton veten si forcë e ndryshimit dhe si mbrojtëse e një politike të pastër:

“VLEN u themelua për ta shkulur nga rrënjët këtë mentalitet të vjetër, të kalbur e të shitur. Shqiptarët e kanë ndarë mendjen: nuk do të kthehen më prapa tek Taravarët që shiten për tendera, as tek Ahmetët që sunduan përmes frikës dhe korrupsionit. Arben Taravari është simbol i tradhtisë politike dhe vazal i BDI-së ‘non grata’. Shqiptarët nuk do ta falin kurrë këtë shkelje mbi besimin e tyre,” – përfundon VLEN.