Mentor Nazarko: Maqedonia e Veriut ende pa një narrativë historike gjithëpërfshirëse

Analisti dhe gazetari i njohur shqiptar, Mentor Nazarko, në një intervistë për Agjencinë e Lajmeve MIA, ka theksuar se Maqedonia e Veriut vazhdon të përballet me sfida serioze në ndërtimin e një narrative historike të konsoliduar dhe gjithëpërfshirëse, përcjell Flaka Media

Sipas tij, këto vështirësi lidhen si me presionet e brendshme për ndërtimin e identitetit kombëtar, ashtu edhe me ndikimet e vazhdueshme nga fqinjët. Nazarko kujtoi se që nga periudha e Mbretërisë Jugosllave, përmes Jugosllavisë së Titos dhe deri në shpalljen e pavarësisë, lidershipi maqedonas shpesh ka prodhuar narrativa kontradiktore dhe konfuze.

“Frika se shtëpia e pavarur mund të ndahej me shqiptarët, ka nxitur një qasje etnocentrike në shkrimin e historisë, duke përjashtuar apo relativizuar rolin e shqiptarëve”, u shpreh Nazarko.

Ai shtoi se vetëm kohët e fundit ka një pranim më të gjerë të kontributit të çetave shqiptare në luftën kundër Perandorisë Osmane, përkrah atyre maqedonase. Megjithatë, sipas tij, ende mbetet e pazgjidhur çështja e mosnjohjes zyrtare të origjinës shqiptare të banorëve të Rekës së Epërme, pavarësisht gjallërisë gjuhësore dhe folklorike që dëshmon identitetin e tyre.

“Shqiptarët ortodoksë mund të jenë dhe duhet të jenë një urë e re miqësie dhe pajtimi midis maqedonasve dhe shqiptarëve”, theksoi Nazarko.

Analisti paralajmëroi gjithashtu për zbehjen e arritjeve të Marrëveshjes së Ohrit, duke përmendur përdorimin korrekt të gjuhës shqipe dhe respektimin e parimit të Badenterit si elementë kyç për stabilitetin e vendit.

Në përfundim, Nazarko nënvizoi edhe dimensionin rajonal të marrëdhënieve:

“Shqiptarët kanë çdo arsye historike dhe aktuale për të ndërtuar fqinjësi të mirë me maqedonasit – diçka që përkrahet fuqimisht edhe nga partnerët tanë perëndimorë. Adriatiku, përmes Korridorit Tetë, mund të jetë deti ynë i përbashkët”, tha ai. Flaka Media