VLEN akuzon BDI-në për shpifje ndaj Arben Fetait: “Karvani ynë ecën përpara i pandalshëm”

VLEN ka reaguar ashpër ndaj, siç i quan, “sulmeve të orkestruara” të BDI-së dhe aleatëve të saj kundër zëvendëskryeministrit Arben Fetai.

“Makineria propagandistike e BDI-së dhe e patericave të saj ka nisur një fushatë të ulët shpifjesh dhe gënjeshtrash ndaj zëvendëskryeministrit Arben Fetai. Duke u fshehur pas profileve të rreme dhe duke përdorur metoda të pista, ata përpiqen ta njollosin personalitetin e tij dhe ta pengojnë procesin e ndryshimit që tashmë është bërë i pandalshëm,” thuhet në reagim.

Sipas VLEN-it, këto sulme vijnë nga frika e humbjes së pushtetit dhe ekspozimit të lidhjeve korruptive.
“Ata janë të frikësuar nga transparenca, nga duart e pastra dhe nga vendosmëria jonë për të çrrënjosur keqpërdorimet, korrupsionin dhe lidhjet mafioze që e kanë mbajtur peng shtetin për dy dekada,” thekson partia.

Në kumtesë, VLEN thekson dallimin me BDI-në:
“Asnjë qindarkë publike nuk është keqpërdorur nga përfaqësuesit tanë. Pasuria dhe integriteti i tyre janë libër i hapur, çdo cent i fituar ndershmërisht. Vendimmarrja jonë është e lirë, e pa-ndikuar dhe e pa-shantazhuar, sepse varësia jonë e vetme është ndaj popullit dhe kombit tonë, jo ndaj oligarkëve dhe bosëve të drogës.”

Reagimi përfundon me mesazhin se fushatat e shpifjeve nuk do të ndalojnë misionin e tyre politik:
“Le të shpifin me profile të rreme, le të lehin mercenarët e tyre digjitalë, karvani i VLEN-it ecën përpara i pandalshëm, duke ndërtuar një të ardhme ku shqiptarët fuqizohen, jo shfrytëzohen, një të ardhme pa BDI-në, pa paterica dhe pa pengje të Gjokës.”