A po e braktis Alternativa koalicionin VLEN? Deputetja Sadiku del me qëndrim të pavarur ndaj Paradës së Krenarisë

Deklarata e deputetes së Alternativës, Imerlija Sadiku, me rastin e organizimit të Paradës së Krenarisë në Shkup, ka rihapur debatin për unitetin brenda koalicionit VLEN. Sadiku u paraqit publikisht në emër të Alternativës, duke e distancuar këtë subjekt nga mbështetja ndaj eventit, gjë që përbën shkelje të marrëveshjes për prezantim të përbashkët të partive brenda koalicionit, kumton Flaka

Në një deklaratë për media, deputetja Imerlija Sadiku tha se Alternativa nuk kundërshton mënyrën e jetesës së askujt, por mbetet e përkushtuar ndaj vlerave të familjes tradicionale shqiptare.

“Ne nuk paragjykojmë askënd, por si subjekt politik kemi në themel mbrojtjen e vlerave familjare që burojnë nga tradita jonë kombëtare.” – deklaroi ajo.

Pikërisht kjo dalje e pavarur ka ngjallur reagime në opinion dhe ka ngritur pikëpyetje për pozicionin e Alternativës brenda VLEN-it. Kujtojmë se pas formimit të koalicionit, partitë përbërëse u pajtuan që të mos paraqiten më individualisht në publik me flamuj, logo apo slogane të veçanta, por të veprojnë si një subjekt i vetëm politik.

Shkelja e këtij moratoriumi nga Alternativa, në një çështje sociale si ajo e të drejtave të komunitetit LGBT, mund të sinjalizojë dy zhvillime të mundshme, largimin e Alternativës nga koalicioni, për shkak të mosmarrëveshjeve ideologjike, ose mospajtimin e pjesëve të tjera të VLEN-it me qëndrimin konservator të Alternativës, veçanërisht në raport me qasjen ndaj komuniteteve të margjinalizuara.

Derisa partitë e tjera të VLEN-it, të cilat janë formalizuar tashmë në një strukturë të re politike, nuk reaguan publikisht për ngjarjen e ditës, qëndrimi i Sadikut shihet si paraformë e një pozicionimi të diferencuar të Alternativës për çështje sociale dhe kulturore. Flaka Media