A po e mbush Qeveria buxhetin me gjoba ndaj qytetarëve? Mërgimtarët të bëjnë kujdes!

Gjatë fundjavës së kaluar (05–06 korrik 2025), policia ka realizuar kontrolle të rregullta rrugore në të gjitha akset rrugore të vendit, me një bilanc rekord ndëshkimesh. Sipas të dhënave zyrtare, janë shqiptuar gjithsej 1.336 gjoba, ndërsa 212 prej tyre ishin për drejtim automjeti pa leje drejtimi, transmeton Flaka.

Ndërkohë, 121 shoferë janë kapur duke drejtuar automjetin nën ndikimin e alkoolit dhe janë përjashtuar nga qarkullimi, ndërsa 106 drejtues motorësh janë ndëshkuar për mosvendosje të helmetës mbrojtëse.

Në përputhje me Ligjin për siguri në komunikacion, gjatë kësaj fundjave janë regjistruar edhe:

• 168 tejkalime të shpejtësisë së lejuar,
• 173 raste parkimi të gabuar,
• 100 drejtues automjetesh pa rrip sigurimi,
• 39 raste përdorimi i telefonit gjatë ngasjes,
• 15 kalime në semafor të kuq,
• 4 këmbësorë dhe 2 drejtues trotinetësh elektrikë të gjobitur për shkelje të rregullave.

Sipas Ligjit për automjete, 42 automjete janë larguar nga qarkullimi për shkak të mungesës së regjistrimit, ndërsa 1 automjet për defekte teknike.

Policia paralajmëron se aksionet do të vazhdojnë edhe në ditët në vijim, prandaj, mërgimtarëve që kanë hyrë në vend për pushime verore, të bëjnë kujdes dhe të respektojnë rregullat dhe të tregojnë kujdes në komunikacion, në të kundërtën – do të përballen me masa të ashpra ndëshkuese.

Në rrjete sociale po shtohet pakënaqësia ndaj asaj që shumë qytetarë e quajnë “strategji për të mbushur buxhetin me gjoba”. Flaka