Arbër Ademi: VMRO dhe VLEN duan të fshijnë përfaqësimin e drejtë të shqiptarëve në Polici

Deputeti i BDI-së, Arbër Ademi, ka denoncuar sot një veprim të rëndë politik që, sipas tij, rrezikon drejtpërdrejt Marrëveshjen e Ohrit dhe të drejtat e shqiptarëve në Maqedoninë e Veriut, trasnmeton Flaka. Në një reagim të ashpër publik, Ademi ka ngritur alarmin për një propozim-ligj që parashikon heqjen e nenit 96 nga Ligji për Policinë, nen ky që garanton përfaqësimin e drejtë dhe adekuat të bashkësive në këtë institucion shtetëror.

“Sot jemi dëshmitarë të një tjetër goditjeje të rëndë: VMRO-DPMNE, në bashkëpunim me ‘Vlen’, ka propozuar fshirjen e nenit 96 nga Ligji për Policinë. Dhe kjo po ndodh në heshtje, me dorën e atyre që thonë se ‘kujdesen për shqiptarët’…”, deklaroi Ademi.

Sipas tij, neni që synohet të fshihet, garanton që gjatë punësimit në Polici:

1. Të përfaqësohen në mënyrë të drejtë dhe të barabartë qytetarët që i përkasin të gjitha bashkësive, duke respektuar kriteret profesionale dhe kompetencën.
2. Të respektohet parimi i barazisë gjinore.

Ademi theksoi se ky veprim përfaqëson “sulm institucional, ligjor dhe politik ndaj shqiptarëve dhe Marrëveshjes së Ohrit”, duke paralajmëruar pasoja të rënda nëse ky ndryshim miratohet.

“Skandalet nuk kanë fund! Marrëveshja e Ohrit po shpërbëhet hap pas hapi, ndërsa disa heshtin për interesa politike afatshkurtra,” përfundoi ai. Flaka