Arsovska thërret ndihmë ndërkombëtare

Kryetarja e Qytetit të Shkupit, Danella Arsovska, ka shpërthyer me akuza ndaj liderit të VMRO-DPMNE-së, Hristijan Mickoski, dhe koalicionit VLEN, duke i cilësuar ata si “kriminelë” dhe “shovinistë”. Arsovska shprehet e shqetësuar për, siç thotë ajo, heshtjen e institucioneve ndaj parregullsive dhe krimeve të raportuara në Komunën e Çairit, të cilat pretendohet se janë të dokumentuara me prova.

“Jo vetëm që nuk veprojnë ndaj krimit të dokumentuar në Çair, por vazhdojnë të mbrojnë njëri-tjetrin dhe të kërcënojnë me destabilizim,” shkroi ajo në një postim në rrjetet sociale.

Arsovska apeloi tek institucionet shtetërore, organizatat ndërkombëtare në Maqedoninë e Veriut, ambasadat dhe organizatat për të drejtat e grave, që të reagojnë ndaj, siç tha ajo, sulmeve mizogjene dhe shoviniste që po i bëhen nga bashkëpunëtorët e Mickoskit.

“Mickoski, në mungesë të përgjigjeve për partnerët e tij të dyshimtë nga Çairi, ka filluar të më sulmojë me fyerje seksiste dhe shoviniste,” thekson Arsovska.

Ajo përmendi se gjatë bashkëpunimit të mëparshëm me Mickoskin, ai çdo ditë “hartonte plane për krim në Qytetin e Shkupit”, ndërsa shfaqej herë si “profesor i ndershëm”, herë si “mafiaz”.

Në fund të deklaratës së saj, Arsovska ngre një pyetje direkte: A do të dalë dikush përballë këtyre kriminelëve dhe shovinistëve? A ekziston faktori ndërkombëtar në këtë vend? A ka OJQ për mbrojtjen e grave nga diskriminimi dhe shovinizmi?”, pyet Arsovska. Flaka