ASH i përgjigjet VMRO-VLEN: Nëse keni fakte, paraqitini – ndalni propagandën e ulët ndaj Taravarit

Aleanca për Shqiptarët ka reaguar ashpër ndaj akuzave të fundit, duke i quajtur ato shpifje dhe tentativë për njollosje të kryetarit të partisë, Dr. Arben Taravari.

“VMRO-DPMNE, së bashku me ‘eksperimentin VLEN’, tenton të njollosë figurën e kryetarit tonë përmes shpifjeve dhe lojërave të fjalëve,” thuhet në reagimin e ASH-së.

Partia thekson se nëse ka ndonjë dyshim apo pretendim, ato duhet të faktohen:

“VMRO-DPMNE dhe satelitët e saj, nëse kanë ndonjë dyshim apo pretendim, le t’i faktojnë ato. Në të kundërt, ato mbeten vetëm një propagandë e ulët për të devijuar vëmendjen nga e vërteta: Dr. Arben Taravari ua ka prishur planet ogurzeza ndaj shqiptarëve.”

ASH thekson se të gjitha institucionet janë në kontroll të pushtetit aktual dhe nuk ka asnjë pengesë për të verifikuar faktet:

“Këtë mund ta bëjnë shumë lehtë, pasi të gjitha institucionet shtetërore i kanë nën kontroll dhe kanë qasje të plotë në çdo dokument zyrtar. I ftojmë të zgjohen, nuk janë opozitë, janë pushtet dhe shtet.”

Në reagim shtohet edhe një sfidë e drejtpërdrejtë:

“U bëjmë thirrje që, duke i shfrytëzuar të gjitha kompetencat dhe institucionet që i drejtojnë, të paraqesin qoftë edhe një lidhje të vetme mes investitorit nga Shqipëria dhe Dr. Arben Taravarit. Apo çdo investitor nga Republika e Shqipërisë për ta është i dyshimtë?”

Reagimi përfundon me firmën: Aleanca për Shqiptarët. Flaka Media