ASH reagon ndaj emërimeve të reja: “Po shpërblehen njerëzit e komunikimeve me BDI-në”

Në prag të seancës parlamentare të sotme, ku pritet të formalizohen zëvendësimet në postet qeveritare të lëna nga Aleanca për Shqiptarët, kjo e fundit ka reaguar me një deklaratë të ashpër publike, duke ngritur një sërë pyetjesh ndaj aktorëve kryesorë të qeverisë aktuale, transmeton Flaka Media

Pyetje për VLEN-in dhe VMRO-në

Aleanca ngre dilema të drejtpërdrejta ndaj ish-partnerëve të saj politikë, duke i akuzuar për hipokrizi dhe përçarje të brendshme:

“Bilallin, Izetin i pyesim: A kanë rënë në ujë kumtesat e koordinuara në orët e vona kundër Aleancës për komunikime me BDI-në, kur sot po bëni ministër Azir Aliun, që ka qenë nyja kryesore e atyre komunikimeve?”

Po ashtu, në deklaratë përmendet edhe zëvendëskryeministri Arben Fetai:

“Fetain e pyesim: pjesën më të madhe të posteve që la ASH-ja, heshturazi po i marrin njerëzit e Izetit. Domethënë, në VLEN ti lobove më shumë për njerëzit e Izetit? Dhe kemi dëgjuar që duan të ta marrin postin për të joshur një parti më të vogël – mos do të bëjmë dhe ty ambasador?”

Kritika për “vijat e kuqe” të VMRO-së

Deklarata shkon më tej me një pyetje ironike për VMRO-DPMNE-në, e cila në fushatë deklaronte “vija të kuqe” ndaj BDI-së:

“Ku shkuan ‘vijat e kuqe’ me BDI-në, tani që po sillni në qeveri njerëz që kanë qenë urë lidhëse me BDI-në?”

“Faleminderit që na forcuat”

Duke e përmbyllur deklaratën në mënyrë sfiduese, Aleanca për Shqiptarët shpreh bindjen se skenaret aktuale politike vetëm sa po i rrisin mbështetjen në opinion:

“Ju falënderojmë thellësisht që me pazaret e hapura që po bëni në sy të popullit, keni kontribuar të forconi Aleancën për Shqiptarët si asnjëherë më parë. Populli e kupton çdo ditë e më qartë pse ju braktisëm – e sa mirë që bëmë!”

Deklarata mbyllet me një paralajmërim të drejtpërdrejtë për zgjedhjet e tetorit:

“Tetori është shumë afër, shihemi atëherë!” Flaka Media