ASH Tetovë: Ndalohet gazetari Nevrij Ademi – Kasami po shkel mbi lirinë e shprehjes

Sot në Tetovë ndodhi një akt i rëndë dhe i papranueshëm për një shoqëri demokratike: gazetari i mediumit Tetovasot, Nevrij Ademi, u ndalua dhe u mbajt për më shumë se dy orë në polici vetëm pse kërkoi informacion publik për një çështje që i përket interesit të qytetarëve.

Aleanca për Shqiptarët – Dega Tetovë e dënoi ashpër këtë veprim, duke e cilësuar si urdhër politik të kryetarit të komunës, Bilall Kasami.
“Kur një gazetar ndalohet vetëm pse kërkon të vërtetën, kur policia mobilizohet jo për të mbrojtur rendin por për të mbrojtur interesat personale të pushtetit lokal, atëherë kemi hyrë në territorin e rrezikshëm të autokracisë,” theksohet në reagimin e ASH-së Tetovë.

Sipas kësaj dege, Kasami ka degraduar çdo standard demokratik dhe ka shkelur lirinë e shprehjes në qytet.
“Ky veprim është urdhëruar politikisht nga kryetari i komunës, Bilall Kasami, i cili ka degraduar çdo standard demokratik dhe liri të shprehjes në Tetovë,” thuhet në deklaratë.

ASH Tetovë u bëri thirrje organizatave për të drejtat e njeriut, shoqërisë civile dhe trupave diplomatikë në vend që të ndjekin nga afër këtë sjellje të pushtetit lokal.
“Ne qëndrojmë fuqishëm në krah të mediumit Tetovasot dhe gazetarit Nevrij Ademi dhe çdo zëri të lirë në këtë vend. Tetova nuk do të heshtë përballë frikësimit politik. Liria e shprehjes nuk do të mbytet nga urdhrat e Bilall Kasamit dhe arroganca e pushtetit që veç më i trembet humbjes,” përfundon reagimi.