ASH: VLEN mashtron – përfaqësimi i shqiptarëve në NOMAGAS është vetëm 18.6%, jo 44.4%

Pavarësisht përpjekjeve për të ndërtuar një narrativë të barazisë dhe përfaqësimit, realiteti në institucionet shtetërore që drejtohen nga kuadrot e VLEN-it tregon të kundërtën. Aleanca për Shqiptarët ka reaguar me një kumtesë të fuqishme, ku denoncon manipulimin me shifra dhe dështimin për të korrigjuar padrejtësitë e trashëguara ndaj shqiptarëve në administratën publike.

“Vetë drejtuesit e VLEN-it krenohen me faktin se në konkursin e fundit publik të Shoqërisë Aksionare për Ushtrimin e Veprimtarisë Energjetike – NOMAGAS Shkup, janë punësuar 8 shqiptarë nga gjithsej 18 vende pune. Por nëse kësaj i shtohen edhe të dhënat paraprake – nga 84 punësime vetëm 11 shqiptarë – rezultati është 19 shqiptarë nga 102 punësime në total, ose vetëm 18.6% përfaqësim. Kjo nuk përmbush as minimumin e garantuar me ligj, e jo më të jetë ndonjë sukses,” thuhet në reagimin e Aleancës.

Partia kritikon ashpër pretendimet publike të përfaqësuesve të VLEN-it, të cilët, sipas tyre, “mashtronin me vetëdije duke e paraqitur përfaqësimin si 44.4%, në një tentativë për të fshehur realitetin e mjerueshëm të mosbarazisë strukturore.”

Sipas Aleancës për Shqiptarët, kjo është një provë e qartë që VLEN, edhe aty ku është në krye të institucioneve, nuk ka guximin e nevojshëm politik për të sfiduar strukturat reale të pushtetit, të cilat kontrollohen nga partnerët e tyre qeveritarë – Hristijan Mickoski dhe Stojançe Angellov.

“VLEN nuk është qeveri e shqiptarëve, por një vegël e bindur në duart e politikave që shqiptarët i shohin si numra për vota dhe jo si qytetarë me të drejta të barabarta,” thuhet më tej në deklaratë.

Aleanca thekson se ky është edhe një nga arsyet kyçe që ka çuar në braktisjen e qeverisë nga ana e tyre, pasi nuk mund të jenë pjesë e një pushteti që “simbolikisht emëron shqiptarë drejtorë, por realisht ua mohon mundësinë për të përmbushur barazinë që iu takon.”

Në fund të deklaratës, Aleanca për Shqiptarët shprehet qartë:

“Ne do të vazhdojmë të denoncojmë çdo shkelje të barazisë, çdo manipulim me opinionin dhe çdo përpjekje për ta shitur padrejtësinë si sukses. Barazi nuk ka kur shqiptarët nuk përfaqësohen denjësisht. Barazia nuk është një shifër false, por një standard real, që me VLEN nuk përkon as për së afërmi.”

Deklarata vjen në një moment kur çështja e përfaqësimit të drejtë në institucionet publike është rikthyer fuqishëm në debatin politik dhe qytetar në vend. Flaka Media