BDI: Anëtarët po e lënë VLEN-in, shqiptarët kanë hequr dorë nga gënjeshtrat e Mexhitit

“Çdo ditë e re është një humbje e re për VLEN-in. Anëtarë, aktivistë dhe struktura të tëra po largohen, duke lënë pas një koalicion artificial, të zbrazët dhe të diskredituar. Vetëm gjatë këtyre ditëve, anëtarë dhe struktura nga tre komuna u distancuan publikisht nga ky grupim,” – thuhet në reagimin e BDI-së.

Sipas kësaj partie, kjo është dëshmi e qartë se shqiptarët nuk mund të udhëhiqen me gënjeshtra dhe se “politika e ndërtuar mbi interesa personale gjithmonë përfundon me dështim”.

“Mexhiti dhe rrethi i tij i ngushtë e shndërruan partinë, pa struktura të formuara, në një biznes privat, pa ide dhe pa vizion. Ata që dje besonin se VLEN do të sillte ndryshime, sot po e shohin fytyrën e vërtetë të lakmisë, përçarjes dhe tregtisë me interesat shqiptare,” – theksoi BDI.

Nga kjo parti shtojnë se shqiptarët dinë ta ndëshkojnë politikën që i nënvlerëson.
“VLEN është një eksperiment i dështuar politik i Mickoskit dhe qytetarët këtë e kanë kuptuar. Mexhiti po përpiqet ta fshehë katastrofën me sulme dhe deklarata boshe, përmes propagandës proserbe të mikut të tij Stoilkoviq, i cili vetë ka pranuar se në dy-tri raste e ka shpëtuar nga turpi publik. Sidoqoftë, shqiptarët nuk e dëgjojnë më dhe e dinë të vërtetën,” – thuhet në reagim.

BDI thekson se, ndërsa VLEN po shpërbëhet para syve të opinionit, Besëlidhja – Aleanca Kombëtare për Integrim qëndron e fortë.
“Kjo është forca e vërtetë politike që rritet çdo ditë dhe që do ta udhëheqë popullin shqiptar përpara, të bashkuar dhe me dinjitet,” – përfundon reagimi.

Sipas BDI-së, tetori po afrohet dhe me të edhe ora e përgjegjësisë politike dhe juridike.
“Populli në referendum do t’ua japë ndëshkimin,” – paralajmërojnë nga kjo parti.