BDI: Autostrada Shkup – Bllacë, peng i lojërave politike të Qeverisë

Bashkimi Demokratik për Integrim shpreh shqetësimin e thellë për sabotimin sistematik të projektit të Autostradës Shkup – Bllacë, një lidhje strategjike jo vetëm për shqiptarët, por për të gjithë rajonin dhe partneritetin tonë me Republikën e Kosovës.

Edhe pse më shumë se dy kilometrat e para janë përfunduar me sukses gjatë qeverisjes së kaluar, kjo Qeveri vazhdon të refuzojë hapjen e tyre për përdorim publik, fillimisht duke premtuar gjoja një “revision teknik”, e tash duke deklaruar fillimin e një “procedurë të re për prokurim publik”. Ky është një skenar i njohur politik për të zvarritur dhe bllokuar qëllimisht projektet që janë iniciuar nga BDI dhe që lidhen drejtpërdrejt me interesin strategjik të vendit.

Qëllimi është i qartë dhe i lexueshëm: çdo investim madhor që është planifikuar dhe nisur nga BDI duhet të ndalet, të zhbëhet, të harrohet. Kjo është logjika që udhëheq këtë qeveri pa legjitimitet etnik, e cila funksionon nën tutelën e interesave që duan të minojnë rolin institucional të shqiptarëve në shtet.

Për më tepër, shqetësuese është roli i VLEN-it, që në vend të përfaqësojë interesat e shqiptarëve, është shndërruar në zbatues të bindur të agjendës politike të VMRO-së, duke përkrahur çdo vendim që shkon në dëm të projekteve kombëtare dhe zhvillimore.

BDI siguron qytetarët se pas tetorit, me rikonfirmimin e saj si forcë udhëheqëse, të gjitha projektet e nisura do të marrin rrugën e përfundimit, ashtu siç e meritojnë qytetarët tanë. Autostrada Shkup – Bllacë do të bëhet realitet, jo për inat të dikujt, por për të ardhmen tonë të përbashkët europiane dhe zhvillimin rajonal.