BDI Tetovë: Të zbardhen kontratat në vepër në Komunën e Tetovës

Bashkimi Demokratik për Integrim – Dega në Tetovë ka kërkuar zyrtarisht transparencë dhe llogaridhënie nga Komuna e Tetovës për mënyrën e shpenzimit të buxhetit komunal, përcjell Flaka. Në një reagim publik, BDI shpreh shqetësimin për raportimet mediatike dhe burimet zyrtare që tregojnë se persona të caktuar po paguhen përmes kontratave në vepër, pa pasur ndonjë angazhim konkret në Komunë apo në ndërmarrjet publike.

“Këto pagesa të pajustifikuara përbëjnë abuzim me mjetet publike dhe padrejtësi ndaj qytetarëve të Tetovës,” thuhet në deklaratën e BDI-së, duke shtuar se buxheti komunal duhet të shërbejë për rrugë, shkolla, ujësjellës dhe përmirësim të shërbimeve publike, e jo për qëllime politike apo logjistikë partiake.

Këshilltarët komunalë të BDI-së në Kuvendin Komunal të Tetovës kanë dorëzuar një kërkesë zyrtare për qasje në informata me karakter publik. Qëllimi është të zbardhet lista e personave të angazhuar me kontratë në vepër dhe të shpjegohet baza ligjore dhe funksionale e këtyre angazhimeve.

“Tetovarët kanë të drejtë të dinë se ku shkojnë paratë e tyre,” thuhet më tej në komunikatë, duke nënvizuar se paratë publike duhet të shërbejnë për projekte konkrete që përmirësojnë jetën e qytetarëve.

BDI – Dega Tetovë thekson se transparenca dhe llogaridhënia janë detyrim ligjor i çdo udhëheqësie lokale që kujdeset për qytetarët. Flaka