Danella Arsovska shpërthen ndaj VMRO-së: “Sekti mickovian që mbron krimin”

Kryetarja e Shkupit, Danella Arsovska, ka reaguar ndaj sulmeve të orkestruara ndaj saj nga, siç i quan ajo, “sekti mickovian”, duke i akuzuar për hipokrizi dhe mbrojtje të hapur të krimit në Ministrinë e Punëve të Brendshme, transmeton Flaka

Në një deklaratë publike, Arsovska shprehet:

“Sekt mickovian, kam shtetësi çeke që nga lindja. Prindërit nuk kam mundur t’i zgjedh vetë. Kam shtetësi maqedonase nga babai dhe çeke nga nëna.”

Ajo kritikon taktikat e përdorura nga njerëz të afërt me VMRO-DPMNE-në, duke i krahasuar me metodat që, sipas saj, janë përdorur më herët nga ish-kryeministri Zoran Zaev:

“Meqë nuk guxoni t’i qaseni Visar Ganiut, nuk e di cili mendje e sëmurë jua ka shpikur strategjinë për të më satanizuar me truket e Zoran Zaevit.”

Më tej, Arsovska sfidon VMRO-në që të dalë publikisht dhe të sqarojë pozicionin ndaj dhunës dhe diskriminimit mbi baza etnike apo kombëtare:

“Hajde, lehni, ‘luanë’ të Mickoskit – dilni publikisht në konferencë për shtyp para Europës dhe thoni me zë të lartë: a e justifikoni që dikush, vetëm pse është bullgar, rom, boshnjak, francez, grek apo edhe marsian, të sulmohet dhe të rrihet?”

Deklarata përfundon me një goditje të drejtpërdrejtë ndaj Ministrisë së Brendshme:

“MPB-ja juaj është e kriminalizuar, dhe ju jeni peng i krimeve të Visar Ganiut.” Flaka