Deklarata pas zjarrit – ku ishin institucionet para se të digjej ‘Puls’

Ministri i Punëve të Brendshme, Pançe Toshkovski, gjatë raportimit vjetor për mandatin e tij të parë, deklaroi se MPB-ja ka ndërmarrë hetimin më të madh në historinë e saj lidhur me tragjedinë në objektin “Puls”, ku humbën jetën 62 persona dhe mbi 200 të tjerë u lënduan.

Ai theksoi se për herë të parë pas një tragjedie të kësaj përmase, janë ngritur kallëzime penale ndaj dhjetëra zyrtarëve të lartë, përfshirë ish-ministra, ministra aktualë, drejtorë, kryetarë komunash, nëpunës policorë dhe drejtues të institucioneve shtetërore. “Përgjegjësi duhet të ketë”, tha ministri Toshkovski, duke shtuar se MPB-ja tashmë po zbaton një qasje aktive dhe të vendosur ndaj krimit dhe korrupsionit.

Në kuadër të rehabilitimit për të lënduarit, Toshkovski bëri të ditur se është vënë në funksion kompleksi i rinovuar në Ponikva, ku tashmë po trajtohen disa prej të mbijetuarve të tragjedisë.

Krimi dhe korrupsioni – përballje me rrjete dhe struktura të vjetra

Sipas Toshkovskit, viti i kaluar ka qenë një pikënisje e rëndësishme për rindërtimin e sistemit të rendit dhe sigurisë. Ai paralajmëroi se pavarësisht përpjekjeve të strukturave të korruptuara për të ruajtur status quo-në, lidershipi aktual nuk do të lejojë kthimin pas.

Në luftën kundër krimit të organizuar, janë shkatërruar 14 grupe kriminale, përfshirë një grup të rrezikshëm të përfshirë në 9 vrasje dhe një sërë aktesh të dhunshme. Ndërkohë, në fushën e luftës kundër korrupsionit janë ngritur kallëzime penale kundër 107 individëve dhe 18 kompanive, duke zbuluar dëm ndaj shtetit mbi 17 miliardë denarë.

Rekorde në luftën kundër narkotikëve dhe skema korruptive në prodhimin e kanabisit

Toshkovski bëri të ditur se gjatë vitit janë zbuluar mbi 860 vepra penale që lidhen me narkotikë, me sekuestrim të mbi 430 kilogramëve drogë, përfshirë kokainë në sasi rekord. Po ashtu, janë parandaluar tre kontrabanda ndërkombëtare dhe janë zbuluar manipulime në kompanitë e kanabisit, nga të cilat janë sekuestruar mbi 6 tonë marijuanë.

Ministri theksoi se asnjë individ apo strukturë nuk do të mbetet pa u përballur me drejtësinë, pavarësisht funksionit apo ndikimit që kanë pasur deri tani.